Жерге қатысты әлеуметтік желіде тарап кеткен алыпқашпа әңгімелер шындыққа сай келмейді

Бұл туралы Ауыл шаруашылығы министрінің орынбасары Ерлан Нысанбаев мәлімдеді.

Ауыл шаруашылығы министрінің орынбасары Ерлан Нысанбаев «Жер қатынастарын реттеу» туралы заң жобасына енгізілгелі отырған өзгерістерді тағы бір түгендеп шықты. Оның айтуынша, олар жер телімдерін сату не болмаса шетел азаматтарына жалға беруді көздемейді. Керісінше, «заң жобасы ауыл шаруашылығы мақсатындағы жерлерді беруге жарияланған мораторий шеңберін кеңейтуге бағытталған», – деді вице-министр.

Ерлан Нысанбаев, ҚР Ауыл шаруашылығы министрінің орынбасары:

— 2016 жылдың мамыр айында Елбасының жарлығымен және тиісті заңмен Жер кодексінің жекелеген нормаларына 2021 жылдың 31 желтоқсанына дейін мораторий енгізілді. Атап айтқанда, ауыл шаруашылығы мақсатындағы жерлерді қазақстандықтарға жекеменшікке және шетелдіктерге жалға беруге мүлдем тыйым салынды. Заң жобасында бірде-бір норма қазақстандыққа жекеменшікке беру болмаса шетелдіктерге жалға беру қарастырылмаған. 

Сондай-ақ «Жер қатынастарын реттеу мәселелері бойынша өзгерістер мен толықтырулар енгізу туралы» заң жобасы шетел азаматтары мен азаматтығы жоқтарға және Қазақстан азаматымен некеде тұрған шетелдіктерге шекаралық аймақтардан жер беруге тыйым салуды көздейді. Жалпы, құжатта 5 бағыт қарастырылған. Олар негізінен ауылшаруашылық мақсатындағы жер телімдерін жалға беру, пайдалану және бақылау нормаларын жетілдіруге арналған. Сондай-ақ берілетін жердің аумағы да назардан тыс қалмайды.

Ерлан Нысанбаев, ҚР Ауыл шаруашылығы министрінің орынбасары:

— Осы заңмен бір қолға үлкен көлемде жер берілуге шектеу қойылады. Ол үшін әдістеме жасалды. Сол әдістеме бойынша әр өңірде сол жердің құнарлылығына қарай, климатына қарай, халықтың тығыздығына қарай беріледі.

Естеріңізге сала кетейін, 21 ақпанда жер қатынастарын реттеу туралы заң жобасын Мәжіліс депутаттары екінші оқылымда мақұлдаған болатын. Қазіргі уақытта құжат Сенатқа жіберілді.

Дереккөз: 24.kz