Апатты жағдайдағы ескі үйден құтылып, жақында жаңа қонысқа көшкен қызылордалықтардың берілген баспананың сапасына көңілі толмайды.
Тұрғындар даулы мәселенің оң шешілуінен үміттеніп, біздің арнамызға арнайы хабарласты. Олар мердігер мекемелерді жауапқа тартып, пәтерлердің кем-кетігін жөндеп беруді талап етіп отыр.
Жаппасбай батыр көшесіндегі көпқабатты үй 3 ай бұрын пайдалануға берілді. Оған апатты үйлердің тұрғындары қоныстанды.
Соның бірі – Индира Әбитова. Зарыға күткен баспанасында газ, су және жылу болмағандықтан, қазір ол отбасымен бірге қыстап шығу үшін туыстарын паналап жүр. Индира Әбитова, Жаппасбай батыр көшесі №183 үй тұрғыны:
– Суық басталысымен барлық бөлме азынап кетті. Мұз. Міне қараңыздар, жылуды түнде өшіріп тастайды, күндіз қанжылым. Жылу тоқтаса, бірден су ақпай қалады.
«Кемедегінің жаны бір» демекші бұл жағдай барлық қоныстанушылардың басына туған. Олардың айтуынша, құрылыс жұмыстары сапасыз жүргізілген. «Бұрынғы ескі үйлеріміз ондаған жылда міз бақпап еді, ал жаңа үй алғашқы қысқа шыдас бермеді», – деп тұрғындар қынжылып отыр.
Рақым Жамбылов, Жаппасбай батыр көшесі №183 үй тұрғыны:
– Осы үйді алғалы бері бірыңғай құрылыс жұмыстарымен айналысамыз. Себебі төбенің, қабырғаның бәрі қабыршақтанып жерге түсіп жатыр.
Бақыткүл Ыбыраева, Жаппасбай батыр көшесі №183 үй тұрғыны:
– Күйеуім асханаға бара жатыр еді, гүрс етіп сылақ түсті. Сосын қорқып кеттік. Үйде кішкентай бала болмағанына шүкір.
Кенжебек Қуандықов, Жаппасбай батыр көшесі №183 үй тұрғыны:
– Өзім I топтағы мүгедекпін. Көшіп келгесін жылы жерге келдік деп ойлап едік. Ток ұяшығынан жел улеу дегенді түсінбедім, оған қайдан келеді жел? Тесік бар ма? Мынаның астынан да ұрады. Шырпыны ұстап тұрсаң, сөніп қалады.
Тұрғындар арызына құлақ түрген қалалық әкімдіктің жауапты қызметкерлері нысанды тексеруден өткізіп, шағымның негізді екеніне көз жеткізді.
Тұрсын Байменов, қалалық құрылыс бөлімінің басшысы:
– Тұрғындардан арыз түсті. Сол арызға байланысты толықтай зерделеу жұмыстары жүргізіліп, қазіргі таңда мердігер мекеме 2 жылдық кепілдеме мерзімі бойынша кеткен кемшіліктерді толықтай жоюға толықтай тапсырмалар берілді.
Айдарбек Сейтмұратов, «Қазқұрылыс сервис» ЖШС бас директоры:
– Қабылдаған кезде бәрі тексеріліп, жобадан ешқандай ауытқу болмаған. Майда-шүйде кемшілік болады. Бірақ енді алып бара жатқан ештеңе жоқ. Біз оның бәрін өзіміздің уақытымыз бойынша барлық кепілдік мерзімінде сақтаймыз. Бәрін орнына келтіріп береміз.
Қызылордада жалпы апатты үйлер мәселесі толықтай жойылды. Соңғы 3 жылда 10-нан астам шағын аудан салынды. Құрылыс қарқыны қуантады, әрине, тұрғындар тілегі тек сапасы да талапқа сай болса дегенге саяды.
Дереккөз: 24.kz
