Созақ ауданының әкімі Салыхан Полатовтың халыққа есеп беру кездесуіне Оңтүстік Қазақстан облысы әкімінің бірінші орынбасары Әліпбек Өсербаев қатысты. Аудан әкімінің өткен жылы атқарған жұмыстары туралы есебі мен 2018 жылдағы жоспарларын тыңдаған Әліпбек Шәріпбекұлы Теріскей өңірінде әлі де болса ауыл шаруашылығы саласы мен шағын және орта кәсіпкерлікті жүйеге келтіру керек деп есептейді.
Әліпбек Өсербаев:
«Жалпы өңірлік өнім көлемі 2017 жылы 242 млрд.теңгені құраған. Ондағы ауданның үлесі бар болғаны 4,5% ғана екен. Қалған көрсеткіштің барлығы аумақтағы уран кәсіпорнының еншісінде. Созақ ауданының өнеркәсібі тек қана уран өндіруші кәсіпорындарына тәуелді болып қалмау керек. Ал бұл жұмыстардың барлығын жүйелеуге — аудан әкімі Салыхан Полатовтың іскерлігі, білімі де жетеді. Оны мен Түркістан қаласының әкімі болып қызмет жасағанымда көзбен көргенмін. Сол кезде Отырар ауданының әкімі болған Салыхан Сабырұлы ондағы ауыл шарушалығы болсын, басқа да салаларда қыруар тірлік жасап кетті. Өз басым тәжірибелі маман ретінде қатты құрметтеймін!»