Аймақ басшысы Жансейіт Түймебаев Шымкент қаласындағы 60 жылдық тарихы бар «Металлург» саябағының ашылуына қатысты. Аталған саябақ қайта жөндеу жұмыстарынан өтіп пайдаланылуға берілді. Тұңғыш Президент күніне орай ұйымдастырылған салтанатты шарада Облыс әкімі тұрғындар мен қонақтарды мерекемен құттықтады.
Елбасымыз үнемі қаламыздың дамуына ерекше мән беріп, жарқын болашаққа үлкен сенім артып келеді. Металлург саябағының атауы Елбасы есімімен ерекше байланысы бар. Өйткені, Елбасымыз Нұрсұлтан Назарбаев та ең алғаш еңбек жолын қарапайым металлургтен бастаған. Салтанатты мерекеге ОҚО Құрметті азаматы, «Құрмет» орденінің иегері, Президентіміздің курстасы Аманәлі Әбдіраманов келіп, өзінің ыстық лебізін білдірді.
Айта кетсек, саябақтың іргетасы 1957 жылы қаланған. Қалпына келтіру жұмыстарынан соң саялы мекеннің аумағы 3,6-дан 5 гектарға дейін ұлғайды. Демалыс аумағына жарық шамдар мен қоқыс жәшіктер орнатылып, келушілерге көтеріңкі көңіл күй сыйлайтын субұрқақ салынды. Шара соңында, аймақ басшысы саябаққа ағаш көшеттерін отырғызып, қаланың көркеюіне өз үлесін қосты.
Жансая Елемесова
