Шымкент қаласындағы бірқатар маңызды көшелер бойындағы жаяу жүргіншілерге арналған ескі жолаяқтар қайта жаңартылып жатыр. Мәселен, Қазыбек би және Рысқұлов көшелерінің қиылысы мен Нәзір Төреқұлов көшесіне дейінгі ұзындығы 3 шақырымға жуық аралықта дәл қазір жолаяқтарды алмастыру жұмыстары қызып тұр. Мұнан өзге, Қарауылбек Қазиев және Мәделі Қожа көшелерінде де тиісті жұмыстар жалғасын табуда. Жергілікті бюджет есебінен атқарылып жатқан күрделі құрылысқа тапсырыс беруші мекеме Шымкент қалалық тұрғын-үй коммуналды шаруашылық бөлімі болып табылады. Ал аталмыш көшелердің жолаяқтарын жаңалап шығу құрылыс саласында тәжірибесі мол Алматылық «Корпорация AIS» ЖШС-не жүктелген. Осы орайда мердігер мекеме құрылыс кестесіне сай, үш ай мерзім ішінде жобада көрсетілген көшелердің жолаяқтарын толық алмастырып шығатын болады. Мұнан өзге «Корпорация AIS» ЖШС-і Шымкент қаласы бойынша жолаяқтарды күтіп ұстау бүлінген жерлерін алмастырып отыру жұмыстарына да жауапты. Сондықтан, құрылыс компаниясы тиісті шараларға бүгінде 40 шақты жұмысшысын жұмылдырып отыр.
Абай Омар
