Бас қалада орналасқан Қазақстан Қарулы Күштеріне қарасты Ұлттық әскери-тарихи музейдің көрме залдарына облыстық һәм қалалық музейлердің ең құнды деген экспонаттары әкелініп қойылуда.
Бұл дүниелерді ЭКСПО көрмесіне келген шетелдік қонақтар мен Астанаға ат басын бұрған еліміз тұрғындары тамашалауда. Осында орналасқан экспонаттар арасынан даңқты батыр бабамыз Қаракерей Қабанбайдың қанжарын көзіміз шалып қалды. Бұл жәдігер Түркістан қаласындағы «Әзірет Сұлтан» мемлекеттік тарихи-мәдени қорық музей қорынан жеткізіліпті.
Қанжардың мүйіз сабы жетесіне ақ қорғасын арқылы шегенделіпті. Тегі бұл бертінде жасалған реставраторлар жұмысы болса керек. Қанжардың арқа қырында жетесінен ұшына дейін қатар тартылған қос ойма қобы сызық бар. Ұшы кәдімгі пышақтар сияқты қайқыланып біткен. Қанжар-экспонаттың таныстырылым құжатында: жалпы ұзындығы – 34,4 см, сабы – 11 см, салмағы 0,8 келі делініпті және бұл бұйымды музей қорына өткізген адам ретінде танымал суретші Сахи Романов есімі тіркелген.
Дереккөз: Egemen.kz
