Міндетті әлеуметтік медициналық сақтандыру жүйесінің іске қосылғанына екі аптаға жуық уақыт өтті. Жарна төлейтін санаттағылардың біраз бөлігі жарна төлеуге кірісіп те кетті. Соған қарамастан, халық арасында жүйеге қатысты сан сауал бары рас. Биыл жарнаны кімдер төлейді? Оның мөлшері қандай? Қай жерден төленеді? Төлемесе не болады? Baq.kz тілшісі көпті мазалаған осындай сұрақтардың біразына жауап іздеп көрді.
Міндетті әлеуметтік медициналық сақтандыру іске қосылды. Биыл 1 шілдеден бастап сақтандыру жарнасын жұмыс берушілер мен жеке кәсіпкерлер төлейді.
Жұмыс берушілер қарамағындағы әр жұмыскер үшін жарна аударады. Жарна мөлшері:
2017 жылдың 1 шілдесінен бастап – жұмыскер жалақысының 1%;
2018 жылдан бастап – 1,5%;
2020 жылдан бастап – 2%;
2022 жылдан бастап – 3%.
Шілденің бірінен бастап жарна төлейтін қос санаттың бірі – жеке кәсіпкерлер (жеке меншік нотариустар мен сот орындаушылары, адвокаттар, кәсіби медиаторлар). Олар жарнаны жеке кәсіпкер ретінде өзі үшін төлейді. Жеке кәсіпкердің жарнасы 2 төменгі айлық жалақының 5 пайызын құрайды. Нақтырақ айтқанда, жарна мөлшері 2017 жылы айына 2445 теңге 90 тиынға, 2018 жылы – 2828 теңгеге тең. Жарна есептелетін жалақының ең жоғарғы мөлшері 15 төменгі айлық жалақыдан немесе 366 мың 885 теңгеден аспауы тиіс. Яғни, ай сайын төленетін міндетті жарнаның ең жоғарғы мөлшері 3668 теңге 85 тиыннан аспауы керек. Ал, егер жеке кәсіпкердің қарамағында жұмыс істейтін қызметкерлері болса олар үшін жұмыс беруші ретінде жарна аударып отыруы тиіс.
Шілде айының жарнасын тамыздың 25-іне дейін төлеу керек. Жарнаны екінші деңгейлі банктер мен «Қазпошта» АҚ кез-келген бөлімшесі арқылы төлеуге болады. Төлем кодтары көрсетілген арнайы бланктерді аталған қаржы ұйымдарынан алуға болады.
Дереккөз: Baq.kz