Түлкібаста халықаралық «Батыс-Қытай, Батыс-Еуропа» жол бойынан сервистік қызмет көрсету орталығы ашылмақ. Жолаушыларға арналған орталықтың құны 346 млн теңгені құрайды. Мұнан бөлек, аудан экономикасын көтеру мақсатында құрылған индустриялдық аймақта 6 жобаны жүзеге асыру жоспарланып отыр. Бұл туралы Орталық коммуникациялар қызметінде өткен брифингте аудан әкімі Нұрбол Тұрашбеков айтты.
Табиғаты шұрайлы, туризмге қолайлы Түлкібасқа жыл басынан бері, 45 мыңдай турист келген. Ендігі жерде келушілердің саны арта түсетін болады. Өйткені биыл 1000 адамға арналған отбасылық демалыс кешені бой көтерді. Жеке кәсіпкердің қаражатына ашылған демалыс орны барлық талаптарға төтеп береді. Сонымен қатар, Жабағылы ауылында жалпы құны 350 млн теңгені құрайтын «Жайлау» емдеу сауықтыру орталығы ашылады деп жоспарлануда. Ал, Түлкібастың бренді, алма бау шаруашылығы да ауданда жақсы дамып келеді.
Түлкібаста 1322 отбасы баспана кезегінде тұр. Олардың мәселесін шешуде кезең-кезеңімен тиісті жұмыстар атқарылып жатыр. Мәселен, Т.Рысқұлов ауылында 32 пәтерлі 2 тұрғын үйдің сметалық құжаты дайын. Ендігі жұмыс қаржының бөлінуі. Мұнан бөлек, баспана жайын шешуде 2017-2020 жылдары аралығында ауқымды жобалар жүзеге асып, кезек күткен азаматтардың баспана базынасы шешіледі деп күтілуде.
Көгілдір отын мен ауыз сумен толықтай қамтамасыз етілген Түлкібастықтарда жұмыссыздық деңгейі 5,2 пайызды құрап отыр. Ендігі жерде ол азаматтардың екі қолына бір күрек тауып беріп, орта және кіші бизнес өкілдеріне мүмкіндік жасау мақсатында да жоспарлы жұмыстар жүзеге асуда.
Еңлік Заманхан
