28 маусым – Қазақстан Республикасы Байланыс және ақпарат қызметкерлері күніне орай мерекелік шара ұйымдастырылып, ақпарат саласы қызметкерлерін кәсіби мерекесімен ОҚО әкімі Ж.Түймебаев құттықтады.
Мерекелік шарада Ж.Түймебаев Оңтүстіктің қоғамдық-саяси, әлеуметтік-экономикалық, мәдени өміріндегі жетістіктерін насихаттауға және облыс тұрғындарының бірлігін нығайтуға қосқан үлесі үшін бірқатар журналистерді марапаттап, тәжірибе алмасу мақсатында Түркия еліне өңірдегі бас редакторлармен меншікті тілшілерге жалпы саны 20 адамға жолдама берді. Туысқан елге барып, тәжірибе алмасуға мүмкіндік алған азаматтар қатарында «Айғақ» телеарнасының редакторы Абай Омар да бар.
Сондай-ақ, бұл күні арнамыздың редакторы Гүлжан Келдебекова ОҚО әкімінің Алғыс хатымен марапатталса, наурыз айында «Түркістан-түркі әлемінің мәдени астанасы» жылының ашылуынан кең көлемді хабар әзірлегені үшін Салтанат Тойболова ОҚО әкімінің Алғыс хатымен, Еңлік Заманхан мен Давран Абдиевтер ҚР Орталық Коммикациялар қызметінің Алғыс хатымен марапатталып, бағалы сыйлықтарға ие болды.
ОҚО Ішкі саясат басқармасының ұйымдастыруымен өткен «Отансүйгіштік — мемлекеттік рәміздерді құрметтеуден басталады» атты байқауда Абай Омар топ жарып, Алғыс хатпен марапатталды.
