Бүгін Парламент палаталарының бірлескен отырысында Мәжіліс депутаты Владислав Косарев үкімет мүшелеріне банктер мен қаржы секторын «мәпелеп, аяламауға» кеңес берді, деп хабарлайды Baq.kz тілшісі.
«Құрметті министрлер, әсіресе коммерциялық блоктың өкілдері! Банктер мен қаржы секторын қасиетті сиыр сияқты мәпелеп, аялауды қойыңыздаршы. Нақты секторға назар аударыңыздар! Менің пікірімше, сіздер біздің экономикамызда маңызды орын алатын дәстүрлі салаларды ұмытып кеттіңіздер», — деді ол.
Халық қалаулысының пікірінше, басшылар елімізде бұрыннан қалыптасқан дәстүрлі салаларға мән беруі керек. Себебі, бұл салалар алтын жұмыртқа табатын тауық сияқты.
«Біздің дәстүрлі салаларымыз, былайша айтқанда, алтын жұмыртқа табатын тауық сияқты. Елбасы Конституцияға өзгеріс енгізу бастамасында сіздердің рөлдеріңізді және үкіметтің дербестігін күшейтті. Құрметті министрлер! Ең маңыздысы жауапкершілік күшейді. Оның ішінде мемлекеттік бағдарламаларды әзірлеу барысында. Сіздерге тиісті мүмкіндік беріліп отыр», — деді ол.
Сонымен қатар Владислав Косарев Үкімет басшысына өз өтінішін айтты.
Оның пікірінше, бюджет қаржысын игере алмағандығы үшін жауапты «үлкен басшылардан» алу қажет.
«Бақытжан Әбдірұлы, өтініш, бюджет қаржысының игерілмегендігі немесе мемлекеттік бағдарламалардың орындалмағандығы қарапайым мамандардан сұрай бермей, қасыңызда отырған үлкен басшылардан, министрлерден сұрап көріңізші. Қазіргі таңда мұндай жағдай үнемі қайталанады. Сондай-ақ, бұл әрекет жұмысты орындамағаны үшін жазалау мақсатында нақты бір цифр шығару үшін жүргізіледі», — деп түйіндеді сөзін Мәжіліс депутаты.
Дереккөз: Baq.kz
