Ағымдағы жылдың 5 мамырында «Қазақстан Республикасының Отан қорғаушылар күні» және 9-Мамыр «Ұлы Жеңіс күні» мерекелері қарсаңында ОҚО бойынша Мемлекеттік кірістер департаментінде салтанатты жиналыс өтті.
Мерекелік шараға Оңтүстік Қазақстан облысы мемлекеттік мекемелері қызметкерлері кәсіподақ комитетінің төрайымы Есебаева Күлдар және ОҚО бойынша Мемлекеттік кірістер департаментінің басшылары, басқарма, бөлім басшылары, мемлекеттік кірістер органдарының ардагерлері мен ҰОС ардагерлері қатысты.
Салтанатты жиынды құттықтау сөзбен Оңтүстік Қазақстан облысы бойынша Мемлекеттік кірістер департаментінің басшысы Алтынсары Үмбетәлиев ашты. Өз сөзінде Алтынсары Дүйсенбекұлы қызметкерлерді қос мерекемен құттықтады. Сонымен қатар, шараның құрметті қонақтары, қадірлі қариялар ҰОС ардагерлері Мамұтов Байзақ, Жұмашев Пернебек және Кеңес Одағының Батыры — Сапарбаев Махмеджанға ерліктеріне, Отаңға сүйіспеншіліктіктері мен беріктіктіктеріне шың жүректен алғыс мен құрмет білдіре отырып, сый-сияпаттар табыс етті.
Сондай-ақ, Отан қорғаушылар күні және 9 Мамыр — Ұлы Жеңіс күні мерекелері құрметіне бірқатар қызметкерлер марапатталды. Атап айтқанда, облыстың әлеуметтік-экономикалық дамуына қосқан үлесі, қаржы жүйесіндегі жеткен жетістіктері мен мемлекеттік қызметтегі мінсіз еңбегі үшін, Оңтүстік Қазақстан облысы әкімінің Грамотасы — 4 қызметкерге, Оңтүстік Қазақстан облысы әкімінің Алғыс хаты -2, Оңтүстік Қазақстан облысы мәслихатының грамотасы- 7 , «Нұр Отан» партиясы Оңтүстік Қазақстан облысы филиалының Алғыс хаты — 6, Шымкент қалалық мәслихатының Алғыс хаты – 7 және департаменттің Құрмет грамотасы 13 қызметкерге табыс етілді.
Сонымен қатар, 12 қызметкердің тәртіптік жазалары мерзiмiнен бұрын алынды.
Сондай-ақ, мерекелі шараның қонағы ОҚО мемлекеттік мекемелері қызметкерлері кәсіподақ комитетінің төрайымы Есебаева Күлдар 6 қызметкерге Кәсіподақ комитетінің «Еңбек озаты» төс белгісін табыс етті.
Өз кезегінде салтанатты жиналыс барысында ардагерлер ұйымының төрағасы Бисұлтанов Байназар, Профилактикалық жұмыс және бақылау басқармасы Криминалистикалық бөлімінің басшысы Абдраманов Альмахан, Мемлекеттік кірістер департаменті бастауыш кәсіподақ ұйымының төрағасы Түбеков Ерғазы әріптестеріне мерекелік тілектерін білдірді.
Салтанатты шара соңында ОҚО бойынша МКД қызметерлерінің күшімен дайындалған концерттік бағдарлама ұсынылды.
