Бүгін облыс әкімдігінің үлкен мәжіліс залында ҚР Президенті Н.Ә.Назарбаевтың жуырда жариялаған «Болашаққа бағдар: рухани жаңғыру» атты мақаласын кеңінен насихаттау мақсатында актив мәжілісі өтуде. Мемлекет басшысының Қазақстан халқын дамудың даңғыл жолына бастаған негізгі міндеттеріне Оңтүстік халқы да қолдау танытып, бірлесе жұмыс жасауға шақырады.
Жиынға Оңтүстік Қазақстан облысының әкімі Ж.Түймебаев, облыстық мәслихат депутаттары, аудан, қала әкімдері, облыстық басқармалар, аумақтық департамент, құзырлы орган басшылары және облыс ардагерлері, зиялы қауым өкілдері қатысты.
Актив отырысын жүргізіп отырған облыс әкімі бүгінгі жиынның күн тәртібіне тоқталып, Елбасының жуырда жарияланған мақаласы — мемлекеттік идеологияны анықтайтын басты саяси құжат болып табылатынын айтты.
- Президентіміз үшінші жаңғыру үдерістерінің мақсаттары мен міндеттерін көрегендікпен нақтылай отырып, енді рухани жаңғырудың Жолдауы іспетті дүниесін жариялап, сәулесі бар саналарды дүр сілкіндіріп отыр. «Өткен ғасырдың басты үш идеологиясы — коммунизм, фашизм және либерализм біздің көз алдымызда күйреді», — дейді Елбасымыз өзінің мақаласында. Сондықтан да, Көшбасшы меңзегендей, бүгінде радикалды идеологиялар ғасырының келмеске кеткенін санамыз арқылы біржолата мойындауымыз керек, — деді облыс басшысы.
Салтанат Тойболова.