Бала – біздің болашағымыз. Егеменді еліміздің ертеңі болар бүгінгі жастарға тәлімді тәрбие беру ортақ парыз. Берекелі отбасының сусынына қанып өскен ұрпақ ұлағатын танытады. Ал, балалар үйіне еріксіз телінген қаракөздерді ұдайы назарында ұстайтын ел анасы Жұмазия Кішкентайқызы кезекті рет киімдермен толықтырды. Мерекелік көңіл-күй сыйлауды мақсат тұтқан жан өз қолымен тіккен ұлттық киімдерін арнайы апарып табыстады.
Шымкент қаласындағы мамандандырылған бөбектер үйі 83 сәбиді тәрбиелеп отыр. Әрбір мереке күндері арнайы шаралар ұйымдастырып, белсенділікке үйретеді. Бүгінгі Ұлыстың ұлы күніне негізделген бағдарлама да жауапты дайындықты қажет етті. Ұлттық нақышта киінген бүлдіршіндердің үлгісі өздеріне құйып қойғандай, көңілдері де тоқ. Алаңсыз ойнаған бал шақтың бақытты өтуіне ықпал жасау баршамызға міндет. Өмірде көрген түйгені мол ел анасы Жұмазия Кішкентайқызы осындай балғындардың болашағы үшін қолдан келер көмекті аямауды сұрайды.
Ұлтымыздың ұлысты дәстүрімен бүгінгі мерекеде шашу да шашылды, сахналандырылған көрініс арқылы келін де түсірілді. Ең маңыздысы қаз-қаз алғашқы қадамын басқан бөбектердің тұсауы кесілді.
Осы тұста әрбір мерекелік күндердің күнтізбесінде өз қолынан шыққан туындыларын балаларға табыстап, жанынан табылатын Жұмазия әжейдің ақыл тоқтатқан әрбір жанға айтары бар. Шетелдің ЭКСПО көрмелерін талай рет өз көзімен көрген жанның түйген ойы да ерек.
«Ырыс алды — ынтымақ» десек, айналаны мейірімге бөлей жүріп, көңіліміздің әрдайым жайдары болатындығын ұмытпайық. Сондықтан қолдан келген көмекті бұл тұста аянып қалмаған жөн.
Салтанат Тойболова
