Шымкентте ел Тәуелсіздігінің 25 жылдық мерейтойы мен Қазақстан Республикасы прокуратура органдарының құрылғанына ширек ғасыр толуына орай және Қазақстан Республикасы Бас Прокурорының кубогына арналған аймақтық жарыс ұйымдастырылды. Үш күнге созылған турнирге Алматы қаласы мен Қызылорда, Жамбыл және Оңтүстік Қазақстан облыстарының прокуратура қызметкерлерінен құралған 7 команда қатысты. Осылайша қадағалау орган өкілдері өздерінің жауапты жұмысы мен қым-қуыт тірліктерін ұмытып, спортта сынға түсті.
Айта кетейік, бұл жарыс прокуратура органдары өкілдерінің арасында жыл сайын дәстүрлі түрде өткізіліп тұрады. Турнирге қатысушылар 32-ге дейінгі және 35-тен кейінгі жас ерекшеліктері бойынша спорттың кіші футбол және волейбол түрінен бақ сынасты. Қажымұқан атындағы спорт кешенінде өткен тартысты бәсекеде Қызылорда және Жамбыл облыстарының командалары футболдан өздерінің басым екендіктерін байқатты. Сыр елінің прокурорлары алғашқыда Алматыдан келген әріптестерінен басым түссе, кейін Тараздық теңбіл доп шеберлерін ерекше басымдықпен ұтты. Сөйтіп кіші футболда жастар арасындағы жеңімпаз команда атанды.
Ал, 35 жастан асқандар арасында Алматы командасының ойыншыларына ешкім тең түсе алмады. Ақтық сайыста олар күнгей прокурорларын жеңген болатын.
Сондай-ақ волейбол ойынында да алып шаһардың қадағалау органы өкілдері оңтүстіктің прокурорларынан басым түсті. Енді жеңімпаз атанған командалар еліміздің бас қаласы Астанада өтетін Бас Прокурордың кубогына таласады.
Жалпы қай сала қызметкерлері болмасын, жылына бір рет осындай игілікті іс-шараның басы қасынан табылып жатса, қазақстандық бұқаралық спорттың дамуына алғы шарт болар еді.
Облыстық прокуратураның баспасөз қызметі
