Қазақстанның кейбір өңірлерінде АИ-92 маркалы жанармай бағасының қымбаттауына бірнеше себеп әсер етті. Бұл туралы ҚР Үкіметінің отырысының қорытындысы бойынша өткен баспасөз конференциясында ҚР энергетика министрі Қанат Бозымбаев түсіндірді. Бұл туралы ҚР Премьер — Министрдің ресми сайтында жарияланды.
«АИ-92 маркалы жанармай бағасы сәл қымбаттады. Бұған қатысты үш мәселе бар. Біріншісі, білесіздер, Шымкент мұнай зауыты қазір күрделі жөндеуден өткізіліп жатыр. Оны қараша айының 12-ші жұлдызында іске қосу жоспарланып отыр. Бұл күрделі жөндеу қайта жаңғырту аясында жүргізілуде, өйткені зауытта қажетті жаңа құрылғылар іске қосылып жатыр. Зауыт іске қосылған соң АИ-92 маркалы жанармай көбірек шығарылатын болады, бұл оның бағасына өз әсерін тигізеді деп ойлаймын», — деді министр.
Сонымен қатар, ол 20 күн бұрын жанармай шығаратын Павлодардағы мұнай өңдеу зауытында технологиялық бұзушылық орын алғаны туралы да айтты. Қазір зауытта жөндеу жұмыстары жүргізіліп жатыр.
«Зауыт екі-үш күннің ішінде іске қосылса, жоғары октанды жанармай қазіргіден төмен, өзінің бағасымен көбірек шығарылып, есесіне нарыққа да көбірек келетін болады. Сонда жанармай нарығындағы баға реттеледі», — деп түсіндірді Қ. Бозымбаев.
Министрдің ақпаратынша, қазіргі кезде елімізге импорттық жанармай көптеп келіп жатыр. Ресейде жанармай бағасы Қазақстанға қарағанда қымбаттау болғандықтан, екі елдің жанармай бағасының нарықтағы үлестері құбылмалы болып тұр. Көптеп шығарыла бастаған жағдайда жанармай бағасы 10 күн шамасында қалпына келмек.
«Ал, дизель отынына қатысты айтсақ, оның бағасының төмендеуі байқалады. Атап айтқанда, жазғы дизель отынының бағасы түседі, өйткені қазір оған сұраныс азайып жатыр. Ал қысқы дизель отыны елімізде өндірілмейді, ол Ресейден келеді, сондықтан оның бағаларына ешқандай реттеу жоқ», — деп түйіндеді Қ. Бозымбаев.
