Облыс мәслихатының депутаттарын СҚО-ның әкімі Е.Сұлтанов қабылдады

15 қыркүйек күні Оңтүстік Қазақстан облыстық мәслихатының хатшысы Қамытбек Айтөреев бастаған халық қалаулылары Солтүстік Қазақстан облысына іс-сапармен барды.Петропавлға барған бойда шаһарда орналасқан «Абылай хан резиденциясын» аралап көрген жеті депутат, мұнан кейін оңтүстіктен солтүстікке қоныс аударған отбасылармен кездесіп, олардың хал-жағдайымен танысты.Түс ауа ОҚО мәслихатының хатшысы Қамытбек Айтөреев пен мәслихат депутаттары Мұрат Төлтебаев, Дулат Әбіш, Жаңабай Ағабеков, Алмас Салимов, Мағауия Тұрысбеков, Бахарам Абдукаримовтарды Солтүстік Қазақстан облысының әкімі Ерік Сұлтанов арнайы қабылдады.Кездесу барысында мәслихат хатшысы Қамытбек Айтөреев сөз алып, мемлекеттік бағдарламаның орындалу барысына үлес қосып жүрген оңтүстікқазақстандықтар туралы кеңінен айтты. Еліміздің оңтүстік аймақтарынан СҚО-на жалпы 500-ден астам азамат қоныс аударса, оның 118-отбасы ОҚО-ның тұрғындары. Өз кезегінде Солтүстік Қазақстан облысының әкімі Ерік Сұлтанов оңтүстіктен еліміздің солтүстігіне қоныс аударамын деуші азаматтарға барлық жағдайдың жасалынып жатқандығын, көшіп келушілерге тиісінше көмектің бар түрі көрсетілетіндігін жеткізді. Елбасы саясатын қолдап, ұлы көшке үн қосып жатқан Оңтүстік халқына ризашылық білдірген аймақ басшысы бағдарламаға барынша атсалысуға шақырды.