Үкімет басшысы Оңтүстік Қазақстан облысына жасаған жұмыс сапары барысында кәсіпкерлермен кездесіп, ауыл халқын микронесиелеу және жұмыспен қамту мәселелерін талқылады.
Соңғы жылдары Оңтүстік Қазақстан облысында АӨК-нің барлық бағыттары бойынша тұрақты өсу байқалуда. Аймақтық Индустриаландыру картасының 165 жобасының 65% ауылдық жерлерге негізделген.
Өз кезегінде өңір басшысы еңбекке жарамды азаматтары мол болып табылатын Оңтүстік Қазақстан облысында 498,2 мың адам өздігінен жұмыспен қамтылған тұрғындарға жататынын жеткізді. Облыстың мал шаруашылығын дамытуға бағытталған 2014-2016 жылдарға арналған бағдарламасы туралы да баяндаған аймақ басшысы аталған бағдарламаның ауыл тұрғындарын жұмыспен қамту мәселесін елді мекендерде мал бордақылау алаңдары мен сүт және ет қабылдау бекеттерін ашып, не болмаса, құс фермаларын ашу сынды жобалардың есебінен шешу қажеттігін атап өтті.
«Бүгінде аталған бағдарламаның тиімділігіне ауыл xалқы көз жеткізе бастады. Мәселен соңғы үш жылда 10 мыңға жуық жоба іске асқан. Атап айтқанда, осы мерзім ішінде өңірімізде 8102 шағын мал бордақылау алаңы, 1768 шағын отбасылық сүт фермасы, 104 сүт қабылдау бекеті, сонымен бірге, 25 ауыл шаруашылығы кооперативтері құрылған. Аталған жобалардың жүзеге асуына 12,2 млрд. теңге бағытталған»,-деді Б.Атамқұлов.
Премьер-Министрмен кездесуде аграрлық сектор өкілдері ауыл шаруашылығы өнімдерін жеткізу және сақтауға, сондай-ақ көлік тарифтеріне қатысты мәселелерді көтерді.
Оңтүстік Қазақстан облысы әкімінің баспасөз қызметі
