Қазақстан Республикасы Президенті Әкімшілігінің және Сарыағаш аудандық мәслихатының келісімі бойынша Оңтүстік Қазақстан облысы әкімінің өкімімен Сарыағаш ауданының әкімі болып Қайрат Аманкелдіұлы Әбдуәлиев тағайындалды.
Қайрат Аманкелдіұлы Түлкібас ауданы, Қайыршақты ауылында 1968 жылы 29 желтоқсанда дүниеге келген. Алғашқы еңбек жолын С.Киров атындағы колхозының «Алтын арай» жастар бригадасында шопан болып бастаған. 1987-1989 жылдары Кеңес әскер қатарында болып, 1989 -1994 жылдары Ташкент қаласындағы аграрлық университетінде, 2004 жылы М.Сапарбаев атындағы Оңтүстік Қазақстан гуманитарлық институтын бітірді. Мамандығы ғалым агроном, заңгер. 1994 — 1995 жылдары «Достық» өндірістік коопертивінда агроном, 1995-1999 жылдары Арыс ауылдық әкімшілігінің хатшысы, 1999 -2001 жылдары Түлкібас ауданы әкімі аппаратының аймақтық даму және кадрлармен жұмыс бөлімінде бас маман қызметін атқарды. 2001 жылы Оңтүстік Қазақстан облысы жер ресурстарын басқару жөніндегі комитетінің Түлкібас ауданының өкілі –бас маманы, 2002-2004 жылдары Түлкібас аудандық жер ресурстарын басқару жөніндегі комитетінің төрағасы, 2004 — 2006 жылдары ҚР ауылшаруашылық министрлігінің Түлкібас аудандық аумақтық басқармасының бастығы, 2006 -2007 жылдары ҚР ауылшаруашылық министрлігінің Түлкібас аудандық аумақтық инспекциясының бастығы қызметін абыроймен атқарды. 2007 жылы ҚР ауылшаруашылық министрлігінің Оңтүстік Қазақстан облысы аумақтық инспекциясы өсімдіктер карантин жөніндегі мемлекеттік инспекция бөлімінің бастығы, кейінен ҚР ауылшаруашылық министрлігінің агроөнеркәсіп кешені мемлекеттік инспекция комитетінің Оңтүстік Қазақстан облысы аумақтық инспекциясы өсімдіктер карантин жөніндегі мемлекеттік инспекция бөлімінің бастығы, ҚР ауылшаруашылық министрлігінің агроөнеркәсіп кешені мемлекеттік инспекция комитетінің Оңтүстік Қазақстан облысы аумақтық инспекциясы бастығының орынбасары, 2007- 2010 жылдары ҚР ауылшаруашылық министрлігінің агроөнеркәсіп кешені мемлекеттік инспекция комитетінің Оңтүстік Қазақстан облысы аумақтық инспекциясының бастығы болды.
2010 жылдан бүгінгі күнге дейін Түлкібас ауданының әкімі қызметін атқарып келді.
Айта кетейік, маусым айында өткен VІ шақырылымдағы облыстық мәслихат депутаттарының кезекті үшінші сессиясында 2016-2018 жылдарға арналған бюджетінің негізінде облыстың даму бюджеті нақтыланған болатын. Осы жиында, Сарыағаш ауданының құрылыс нысандарына бөлінген қаражат – 708 млн 213 мың теңгені құраса, 2016 жылға оның 75 млн 954 мыңы нақты берілген. Осыған сәйкес, Сарыағаш ауданында 600 орындық орта мектеп, акушерлік-фельдшерлік тірек және ауылдық емхана бой көтермек.
Сарыағаш ауданының 2016-2018 жылдарға арналған аудандық бюджеті 1, 2 және 3 қосымшаларға сәйкес, оның ішінде 2016 жылға мынадай көлемде бекітілген:
бюджеттік кірістер – 28 971 086 мың теңге,
оның ішінде:
салықтық түсімдер – 3 095 661 мың теңге;
салықтық емес түсімдер – 53 287 мың теңге;
негізгі капиталды сатудан түсетін түсімдер – 38 077 мың теңге;
трансферттер түсімі – 25 784 061 мың теңгені құраған.
106 мың халқы бар Түлкібас ауданын табаны күректей 6 жыл басқарған Қайрат Аманкелдіұлының мемлекеттік қызметтегі тәжірибесі мол. Басқарушылық қабілеті жоғары. Таулы аймақтың туризмін дамытып, өндірісін өркендетуде Әбдуәлиевтің өз қолтаңбасы бар. Енді санақ бойынша 309 мың тұрғыны бар шипалы суымен төрткүл дүниеге танымал Сарыағаштың да облыс әкімі тарапынан потенциалын көтеріп, серпінді жобаларын жүзеге асыру сенімі артылып отыр.
