Оңтүстік Қазақстан облысының әкімдігінде алтыншы шақырылымдағы облыстық мәслихаттың кезекті үшінші сессиясы өтті. Облыстық мәслихат депутаты Ә.Досболовтың төрағалығымен өткен жиын барысында бірқатар өзекті мәселелер реті талқыланды.
Сессия барысында белгілі болғандай, биыл облыс қазынасы республикалық бюджет несиесі мен мақсатты трансферттер есебінен 44363,8 млн. теңгеге артқан. Отырысқа қатысқан облыс әкімі Б.Атамқұловтың айтуынша, бұл қаржының үлкен бөлігі әлеуметтік саланы дамытуға бағытталады. Атап айтқанда, алты жаңа мектептің құрылысына 30 миллион теңге бөлінетін болса, тағы екі нысанды салуды ортақ қаржыландыруға 179,1 миллион теңге қаралмақ. Қажетті қаржы №1 перинаталды орталығының жаңа ғимаратының ЖСҚ-сын жасауға, Шымкент пен Түркістанда медициналық бригадалар құруға бөлінсе, 287,9 млн. теңге ОҚО Ішкі істер департаментінің материалды-техникалық базасын нығайту мен қамтамасыз етуге қаралмақ. Сонымен бірге, жиында Ордабасы, Төлеби аудандары мен Түркістанда 32 тұрғын үйді салу үшін 1,9 млрд. теңге қаржы қаралатын болды.
Сондай-ақ, сессияда облыстық жұмыспен қамтуды үйлестіру және әлеуметтік бағдарламалар басқармасының жұмыспен қамту саласындағы есебі мен облыс әкімдігі және облыстық тексеру комиссиясының 2015 жылдағы облыс бюджетінің атқарылу есебі, сонымен қатар, «Б» корпусындағы әкімшілік мемлекеттік қызметкерлерінің қызмет ету бағасы әдісінің есебі бекітілді. Жиын барысында облыстық мәслихаттың персоналды ономастикалық құрам мен жұмыспен қамту мәселелеріне, БАҚ-пен қарым-қатынасы жөніндегі кеңеске, сондай-ақ, ОҚО әкімдігі жанындағы дағдарысқа қарсы штабқа қатысты шешімдеріне өзгерістер енді.
ОҚО әкімінің баспасөз қызметі
