Республикадағы әрбір төртінші «Алтын белгі» Оңтүстіктен! Бұл жылы өңіріміздің 518 түлегі өздерінің үздік білімдерін дәлелдеп, облыс абыройын асқақтатты. Ұлттық бірыңғай тестілеудің қортындысы бойынша облысымыздың орта баллы 77,7-ні құрап, шәкірттер үмітті ақтады. Дана Абай өзінің он сегізінші қара сөзінде: «Тегінде, адам баласы адам баласынан ақыл, ғылым, ар, мінез деген нәрселермен озбақ» деген екен. Бүгінгі мараптақа кенеліп, ата-анасы мен ұстаздарының үкілеп артқан үмітін мүлтіксіз орындап отырған шәкірттер расында, өзге бітірушілерден ерек. 11 жыл бойы оқып-тоқыған білімдерін ұлттық бірыңғай тестте сарапқа салып, облысымыздың атын шығарған үздіктер. Өңірімізді білім беру саласында озық жетістіктерге жетелеп жүрген дарынды балаларға арналған арнайы мектеп-интернаттарының шәкірттерін, «Алтын белгі» иегерлерін облыс әкімі арнайы құттықтап, алдағы өмір жолында сәттіліктер тіледі.
Республика бойынша 19 үміткер шектік 125 балл жинаған болса, оның 6-уы біздің облыстың түлектері. Бұл оның әрбір 3-шісі оңтүстіктен деген сөз. Осыны ескерген облыс басшысы Бейбіт Бәкірұлы 6 түлекке де 500 мың теңгенің сертификатын табыс етті. Олар: Ордабасы ауданынан Ақмарал Әбубәкір, Аяжан Тортай. Және де шымкенттік 4 түлек: Ерасыл Балтабай, Ақтолқын Асан, Абылай Кеңесбеков, Мерей Турдиевалар. Бұдан әрмен облыс басшысы дарынды да зерек, облыстағы мектеп-интернаттарды тәмамдаған 116 бітірушінің барлығына да арнайы алғыс хат пен «Алтын белгі» төсбелгісін жеке-жеке табыс етті. Өңір басшысының ерекше қолдауына риза болған түлектер өз алғыстарын жеткізіп жатты. 
Жалынды жастар – еліміздің ертеңі, болашағымыздың жарқын кепілі. Білім саласында биік межелер мен бағындырар асқақ асулар әлі алда. Оқушының маңдайынан жетістіктің желі ессе, ұстазының арқасы. Өмір жолының алғашқы шыңын бағындырған зерек те, зейінді шәкірттерге білім берген ұстаздардың еңбегі расында ерен. Көрсеткіштің жоғары болуында, «Перзентім білімді, парасатты болса екен» деген ата-ана арман-мақсатының септігі де жоқ емес. Қуаныштан көңілі тасып отырған отбасылардың бірі Рахымжан қарияның әулеті. Дәулет және Дулат есімді қос немересі «Алтын белгісін» ақтап, бүгіннің өзінде Назарбаев университетінің студенті атанып үлгерген. Бүгіннің өзінді бұл бітіруші түлектер озық білімін дәлелдеп ел Тәуелсізідігінің 25 жылдығына өз үлестерін қосып үлгерді. Зерек зейінімен, талмас талабымен, «Алтын белгісімен» ерекшеленетін түлектер — ертеңгі ел болашағы. Қай саланың тізгінін ұстаса да, қандай маманық иесі болса да, жас та жасампаз қазақ елінің өркендеуі жолында қызмет етеді деген сенімдеміз. Алдағы жарқын күндеріңе сәттілік, ақ жол жас түлек.
Ботагөз Мәдібек
