Бәйдібек ауданында мектеп бітіруші түлектерге арналған дәстүрлі «Ақ жол» акциясы өтті. Яғни ұлттық бірыңғай тестілеу сынағынан өтіп үлкен өмірге қадам басқан өрендерге бұл күні ақ тілектер айтылып, білім шыңын бағындырғандар Алтын белгіге ие болды. Айта кету керек, биыл кең көлемде аталып өтілген айтулы шара аудан орталығында жаңадан ашылған «Тәуелсіздік алаңында» ұйымдастырылған. Биыл Бәйдібек ауданындағы білім мекемелерін жалпы саны 691 түлек бітіріп шықса, соның 488-і ҰБТ-ге қатысып бақ сынаған. Яғни 11 жылдық білімдерін сарапқа салған бұл жылғы сынақ аудан түлектері үшін табысты өтті деуге негіз бар. Себебі өткен жылы тестілеудің орташа көрсеткіші бойынша облыстағы аудан, қалалар арасында 7 орыннан көрінген Бәйдібек ауданы биылғы сынақта 5 орыннан көрінген. Сондай-ақ, 6 бірдей түлек жауапты сынақта биік нәтиже көрсетіп Алтын белгілерін ақтап шықса, 5 үздік аттестат иегерлері де жоғары көрсеткіш көрсетіп отыр. Осы орайда аудан орталығында кең көлемде ұйымдастырылған «Ақ жол» акциясы жаңадан пайдалануға берілген «Тәуелсіздік алаңында» өтті. Айта кету керек, аудан әкімінің бастамасымен биыл еңселі Егемендігіміздің 25 жылдығына тарту ретінде ауданда 25 нысан пайдалануға беру жоспарланса, бұл алаң сол тартудың бірі болатын. Көпшілік іс-шараларды ұйымдастыруға арналған әсем алаңда өткен «Ақ жол» акциясы жаңа орында өткен алғашқы шара болатын. Осы орайда салтанатты шараны аудан әкімі Батырбек Көшербай құттықтау сөзбен ашып берді.
Тәуелсіздік алаңының ашылуымен құттықтап әрі жас талапкерлерге үлкен өмірде сәттілік тілей келген ардагерлер қауымы да айтулы шара барысында жүрекжарды лебіздерін білдірді. Үлкен өмірге қадам басып көңілдері алып ұшқан мектеп бітіруші түлектердің «Ақ жол» акциясы биыл аса жоғары денгейде ұйымдастырылған. Тестілеуде жоғары нәтиже көрсетіп білім шыңын бағындырған жастарды бұл күні арнайы келген облыстық құрылыс басқармасының басшысы Салыхан Полатов та арнайы құттықтап, Алтын белгі иегерлеріне лайықты марапаттарын табыс етті. Келешек бүгінгі жас өрендердің қолында. Сондықтан аудан әкімі шара барысында үлкен өмірге қадам басқан жастарды қалаған мамандықтарының иесі атанып, ел дамуына үлес қосатын азаматтар болуға шақырды. Бұл күні мектепті өте жақсы көрсеткіштермен бітіріп шыққан жастарға аудан басшысы үздік аттестаттарды табыс етіп, алғыс хатпен және бағалы сыйлықтармен марапаттады. Айта кету керек, аудан әкімі бұл ретте үздік оқушыларды тәрбиелеген ата-аналары мен ұстаздарды да ұмыт қалдырған жоқ. Оларға да алғыс айтылып бағалы сыйлықтар табыс етілді. Ал шара соңы еліміздің эстрада жұлдыздарының қатысуымен өткен мерекелік концерттік бағдарламаларға ұласты.
Абай Омар
