Маусым айының үшінші жексенбісі – медицина қызметкерлерінің кәсіби мерекесі. 56 жылға жуық тарихы бар, осы бір айтулы күннің қарсаңында еліміздің денсаулық сақтау саласында еңбегі ерен, дәрігерлер қауымы құрметке бөленуде. Солардың бірі — Шымкент қалалық жедел жәрдем ауруханасының ұжымы. Бүгінгі күні ауруханада ұзақ жылдардан бері еңбек ететін ақ халатты абзал жандар ҚР Денсаулық сақтау министрлігінің Құрмет грамоталарымен марапатталып, түрлі деңгейдегі Алғыс хаттар табыс етілді.
Дәрігер – ұлт саулығының сақшысы. Өмір мен өлімнің арасында жатқан науқастарды ажалдан арашалап, халықтың алғысын арқалаған жандар. Осы орайда денсаулық сақтау саласындағы білікті дәрігер, Шымкент қалалық жедел жәрдем ауруханасының бас дәрігері Мади Бигалиевтің еңбегі еленіп отыр. Атап айтар болсақ, Қазақстан халқы Ассамблеясының сессиясында оңтүстікқазақстандық 15 азаматқа облыс әкімінің «Бауырмал» сыйлығы табыс етілген болатын. Игерлердің бірі Мәди Хожаұлына аталған грантты бүгін ұжым алдында Мұратәлі Қалмұратов арнайы табыс етті. Облысымыз ағза трансплонтациясы жөнінен Республикада алдыңғы үштікте. Бүгінгі күнге дейін 63 бүйрек, 5 бауыр ауыстырылып, өңір медицинасы өзінің даму қарқынын арттырып келеді. Осы жемісті жұмыстың нәтижесінде беріліп отырған қаржылай сыйақыны Мәди Бигалиев ота жасау барысына қатысқан медбике қауымына, ұжымдастарына теңдей бөліп беретіндігін айтты. «Ұлттық медицина ассоциациясының» ОҚО бойынша төрағасы Икрам Төлеев те өз әріптестерін мерекемен құттықтап, ассоциацияның ең жоғарғы наградасы «Өмір үшін» орденінін Бас дәрігердің кеудесіне тақты.
Медицина қызметкерлерінің төл мерекесі қарсаңында облысымыздағы ауруханалар арасында спорт түрлерінен спартакиада өткен болатын. Тартысты додада Шымкент қалалық жедел жәрдем ауруханасының ұжымы командалық есепте 1-ші орынды иеленіп отыр. Осы жетістіктер арқылы 1000-ға жуық қызметкер жұмыс жасайтын ұжымның салауатты өмір салтын нықтап ұстанатынын дәлелдеп отыр.
Ботагөз Мәдібек
