Өздеріңізге мәлім, 14 маусым күні табиғаттың тосын мінезінен өңірдегі бірқатар аудандарда жүздеген нысанның шатыры ұшып, ғимараттарға зиян келген болатын. Қарқындылығы 25-30 метрге жеткен күшті желдің салдарынан Отырар ауданына келген материалдық шығынның көлемі көп болып тұр. Аудан әкіміЕрлан Айтахановтың шешімімен Отырарда «жергілікті сипаттағы төтенше жағдай» деп жарияланды. Енді бюджеттен қаржы бөлініп, бүлінген мүлік қайта қалпына келтіріледі. Дегенмен, мемлекеттің көмегін күтпей-ақ , қазіргі таңда аймақта ең қысқа мерзім ішінде қайта қалпына келтіру жұмыстары басталып кеткен. Оған мұрындық болып аудан әкімдігі мен жергілікті кәсіпкерлер атсалысуда.
Күшті дауылдың 8 ауылдық округтегі 13 елдімекенге зияны тиген. 600-ден аса тұрғын үй,12 мектеп, 3 әкімшілік ғимарат пен екі денсаулық сақтау нысандарына келген шығынның көлемі әртүрлі. Алдын-ала есептеулер бойынша материалдық шығын-76 млн.теңгеге бағаланып отыр екен. «Саусақ бірікпей, ине ілікпейді». Ауызбіршілігі жарасқан ілкімді істі Отырардағы басқалай айтуға келмес. Күні кешегі табиғат апатынан зардап шеккендерге аудан басшылары мен ақ жүрек азаматтары немқұрайлық танытпай, материалдық көмек көрсетуде.
Дауылдан аса қатты зардап шеккен — Шойманов ауылы. Сондықтан негізгі күш осында жұмылдырылған. Төтенше жағдай орын алған күні- ақ жедел құрылған жұмысшы комиссия тобы зардап шеккен тұрғын үйлердің шығынын есептеп, тиісті құжаттарын жиануға қолқабыс етіп жатыр. Мемлекеттің қаржысын күтіп жатпай-ақ, аудан әкімі Ерлан Айтаханов жергілікті кәсіпкер азаматтарды жұмылдырып алғашқы көмекті жеткізді. Яғни тұрғын үйлердің ұшып кеткен шатырларын қайта түгелдеп, азық -түлікпен қамтамасыз етуде. Аудан орталығы Шәуілдірдегі көпқабатты 24 үйде табиғаттың тосын мінезіне шыдас бермей, шатырлары жұлынып кеткен. Бүгін арнайы техникамен жаңа шатырлар әкелініп, үйлердің төбесі жабылып жатыр.
Шытты ауылындағы Дәрібаев мектебі 2012 жылы пайдалануға берілген. 200 орындық мектептің кешегі апаттан кейінгі жағдайы осындай. Ғимараттың шатыры, қабырғалары бүлінген. Мекеме қызметкерлері мен оқушылары өз күштерімен су астында қалған мектеп мүлкін жинастырып, абыр — сабыр болып жатыр. Сондай-ақ, қатты залал келген Айтменов негізі орта мектебінің де көрінісі мәз емес. 100 орындық білім ордасының қазір қайта жобалау сметалық құжаттары дайындалу үстінде. Келтірілген шығын көлемі бес жарым млн.теңге. Бұл қаржы мемлекет қазынасынан бөлінбек. Тек, жергілікті әкімдік құжаттардың рәсімделуін күтіп отырған жокпыз дейді. Аудан басшылары тығырықтан жол тауып, кәсіпкерлерден құрылыс материалдарын қарызға алған. Қолдағы бар дүниемен мектептің шатыры қайта жабылу үстінде.
Ел басына күн туғанда ауданның депутаттары да қарап қалмапты. Халық қалаулылары бір жағадан бас, бір жеңнен қол шығарып, зардап шеккен елдің қасынан табылдық деп отыр. Төтенше жағдайдан келген зардаптың 30-35 пайызын аудан кәсіпкерлердің демеушілігімен ретке келтірмек. Дүлейден аса шығын болған залалдың алпыс пайызы енді бюджетке қарап отыр. Ал аудан әкімі Ерлан Айтаханов оған дейін шығын келген тұрғын үйлерге көмек жалғаса бермек дейді. Сондай-ақ, қатты желден істен шыққан 13 елдімекендегі электр желісі де бүгін қайта қалпына келтіріліп, ауылдар толық жарыққа қосылды.
Гүлжан Нұрланқызы
