Алтыншы шақырылған Шымкент қалалық мәслихатының кезекті үшінші сессиясы өтті. Сессия жұмысына қала әкімі Ғабидолла Әбдірахымов, қала әкімінің орынбасарлары, бөлім басшылары мен аудан әкімдері қатысты. Хайрулла Сәрсенов төрағалық еткен сессияның күн тәртібінде 17 мәселе қаралды. Оның негізгісі – Шымкент қаласының 2015 жылғы бюджетінің атқарылуы туралы есебі. Өткен жылғы қала бюджетінің атқарылуы туралы есебі жайында алдымен қала әкімінің орынбасары Гүлжан Құрманбекова баяндама жасады. Мемлекет қаржысының қай мақсатта жұмсалғаны бұған дейін тұрақты комиссияларда қаралған болатын. Сонымен қатар, бұл мәселеде Оңтүстік Қазақстан облысы бойынша тексеру комиссиясының мүшесі Сырым Шалабай және қалалық мәслихаттың бюджет және басқару мәселелері жөніндегі тұрақты комиссиясының төрағасының орынбасары Ермек Дәрменов қосымша баяндама жасады. Сессияда бұдан бөлек, халық қалаулылары бөлім басшылары мен төрт аудан әкімдігінің атқарған жұмыстары туралы есебін тыңдады. Қаланы абаттандыру, жарықтандыру және санитарлық тазалық бойынша тиісті жұмыстар атқарылған.
— Қаламыз көркейіп, даму үстінде. Шымкентті үшінші мегаполиске айналдыру Елбасының назарында тұрғанын білесіздер. Таяуда осы мақсатты іске асыруда «Shymkent-City» тұрғын үй кешенінің құрылысы басталды. Қазір онда коммуникация жүйелері тартылып жатыр. Жалпы, билік тарапынан қаламыздың әрбір тұрғынына қолайлы жағдай жасалуы тиіс, – деді қала әкімі.
Айта кетейік, бұл қалалық мәслихаттың жаз маусымындағы соңғы сессиясы. Өйткені, халық қалаулылары дәстүрлі демалысқа шығады. Қала әкімі оларға сәттілік тілеп, күзде жаңа күшпен, жаңа идеямен келетіндеріне сенім білдірді.
Шымкент қаласы әкімдігінің баспасөз қызметі
