САРБАЗДАР ӘСКЕРИ АНТ БЕРДІ

Шымкент қаласының гарнизонына қарасты механикаландырылған бригадада 200 жас сарбаз Отанға адал қызмет етуге ант берді. Жаңадан әскер қатарына алынған сарбаздар еліміздің төрт өңірінен шақырылған. Бұл патриоттық сәтке олардың отбасы мүшелері, достары, сондай-ақ әскери бөлімнің жоғары басшылығы, ардагерлері қатысты. Толығырақ тілші тарқатады.

Салтанатты рәсім бөлім аумағында әскери дәстүрге сай өтті. Жаңадан әскер қатарына алынған сарбаздар Қызылорда, Алматы, Түркістан облыстары мен Шымкент қаласынан келіп, алғашқы дайындық кезеңін аяқтады. Әскери ант – олардың әскери өмірдегі ең маңызды әрі жауапты қадамдарының бірі.
Ант қабылдау рәсіміне жауынгерлердің ата-аналары, әскери ардагерлер және бөлімнің жеке құрамы қатысты. Туыстары мен жақындары үшін бұл күн – балаларының азамат ретінде шыңдалып, Отан қорғаушы мәртебесін иеленгенін көрген ерекше сәт болды.
Әскери ант – әрбір сарбаздың өміріндегі зор жауапкершіліктің бастауы. Ендігі жерде сіздер елдің тыныштығы мен қауіпсіздігін сақтау жолында ерлік пен табандылықтың үлгісін көрсетеді деп сенеміз.

Әскери борышын өтеу – әрбір ер азаматтың қасиетті парызы. Отан алдындағы антқа адал болып, мемлекетіміздің қауіпсіздігі мен жарқын болашағы үшін қызмет ету – нағыз ерлік пен жауапкершіліктің белгісі.
Ант қабылдаған жас буын енді негізгі жауынгерлік даярлық кезеңіне кіріседі. Алдағы уақытта олар атыс дайындығы, тактикалық іс-қимыл, саптық жаттығулар және жауынгерлік міндеттерді орындауға қажетті басқа да әскери пәндерді меңгеретін болады.

Бұл күн жас сарбаздардың ғана емес, олардың отбасылары мен жақындарының да жүрегінде ерекше естелік ретінде сақталары сөзсіз. Отан алдындағы парызын өтеуге бел буған жауынгерлерге қызмет жолында табыс пен береке тілейміз.