Оңтүстік Қазақстан облыстық Қазақстан Халқы Ассамблеясының 19-шы сессиясы өтті. «Тәуелсіздік тұғыры – «Мәңгілік Ел!» тақырыбымен өткен алқалы жиынға өңіріміздің түкпір-түкпірінен келген 200-ге тарта делегат қатысты. Олардың қатарында Ассамблея мүшелері мен ардагерлері, этномәдени бірлестік төрағалары, облыстық мәслихат депутаттары, атқарушы органдардың, саяси партиялардың, діни бірлестіктердің, үкіметтік емес ұйымдардың басшылары және зиялы қауым өкілдері де бар. Басты міндеті мемлекеттік ұлттық саясатты іске асыру, қоғамдық-саяси тұрақтылықты қамтамасыз ету бағытында жұмыс жасайтын Ассамблеяның өңіріміздегі құрылымы да табысты жұмыс жасап келеді.Облыс әкімі, Оңтүстік Қазақстан облыстық Ассамблея төрағасы Бейбіт Атамқұловтың төрағалық етуімен өткен 19-сессия отырысына Қазақстан халқы Ассамблеясы төрағасының орынбасары Розақұл Халмұрадов та арнайы қатысты. Ал сессия жұмысы мемлекеттік әнұранымызбен басталды. Биылғы алқалы жиын ең қастерлі құндылығымыз – Тәуелсіздігіміздің 25 жылдығы қарсаңында өтуде. Еліміздің Тәуелсіздік тарихы – татулық пен тұрақтылықтың, бейбітшілік пен келісімнің шежіресі, мызғымас бірліктің жылнамасы. «Байлық та, бақыт та – бірлікте» дейді халқымыз. Бұл ретте татулығымыздың тұтқасы ретінде Қазақстан Халқы Ассамблеясы зор үлес қосып келеді. Айталық өңіріміздегі 100-ден астам этностың басын біріктіретін бірегей құрылым тұрақтылықты сақтап, аймақтың дамуы үшін маңызды рөл атқаруда. 
Осылай деген облыс әкімі біртектілік пен бірлікті нығайту және дамыту бағытындағы атқарылған ауқымды жұмыстарды сөз етті. Аймақ басшысы сессия барысында өңіріміздегі мемлекеттік этносаясатты дамытуға елеулі үлес қосқан 15 азаматқа «Бауырмал» сыйлығын табыс етті. Олардың арасында Облыстық түрік этномәдени бірлестігінің төрағасы Латипша Асанов, «Ынтымақ» этносаралық мәдени бірлестігінің төрайымы Гаухар Төлепова және «Скат» әуе компаниясы АҚ президенті, облыстық Славян этномәдени бірлестігінің мүшесі Владимир Денисовтар да бар.
Ассамблея жұмысының арқасында біздің елімізде этносаралық және конфессияаралық келісімнің бірегей моделі, әрбір азамат этникалық және діни ерекшелігіне қарамастан Конституцияда кепілдік берілген азаматтық құқықтары мен бостандықтарын толық пайдалана алатындай ерекше сенім, ынтымақ, өзара түсіністік ахуалы қалыптасты. Осы орайда сессия барысында сөз алған ҚХА төрағасының орынбасары Розақұл Халмұрадов мәңгілік ел құндылықтары жайын сөз етті.
Ассамблея этномәдени бірлестіктердің күш біріктіруін қамтамасыз етеді, этно мәдени орталықтардың, Қазақстан халқының ұлттық мәдениеттері, тілдері мен дәстүрлерінің өркендеуін, сақталуын және дамуын қамтамасыз етеді. Осы орайда сессия барысында бірқатар азаматтар сөз сөйлеп татулық пен тұрақтылық, отансүйгүштік рух тақырыптарын арқау етті. Соның бірі бұл күні облыс әкімінің «Бауырмал» сыйлығына ие болған Шымкент қаласындағы 66/98 әскери бөлімі рота командирінің орынбасары Ербол Отарбаев болатын. Ол 2009 жылы Ақтау қаласында әскери борышын өтеу кезінде ерліктің ерен үлгісін көрсетіп Елбасы қолынан 3-ші дәрежелі Айбын орденіне ие болған. Яғни түзеу мекемесінде кезекшілікте тұрған сәтінде 21 жазасын өтеуші мекемеден қашуға әрекеттеніп қарулы қарсылық көрсетеді. Сол сәтте жас жауынгер әскери қызметін адал атқарып өзі ауыр жараланса да сотталғандармен қарулы қақтығысқа түседі.
Сондай-ақ, бұл күнгі ОҚО-тық Қазақстан халқы Ассамблеяның 19 сессиясында сөз алғандардың тағы бірі Рүстем Тайыров болатын. Қазығұрт ауданына қарасты Қызылқия ауылдық мәдениет үйінде әдіскер болып жұмыс жасайтын азамат жастайынан қос жанарынан бірдей айрылған. Алайда тағдырдың қатал сынағына мойымаған ол мүмкіндігі шектеулі екендігіне қарамастан тынымсыз еңбек етіп, шәкірт тәрбиелеп, ерекше дарындылығының арқасында бірқатар өнер байқауларына қатысып жүлдегер атанып жүр. Бұл күні облыс әкімінің Бауырмал сыйлығына ие болып, сессияда сөз алған Кентау қаласының тұрғыны Түймегүл Ергешқызы. Ата-ана қамқорлығынсыз қалған 8 перзентті бауырына басып, тәрбиелеп отырған көпбалалы ана асырап алған балаларының арасында орыс, өзбек, кәріс, ұлттарының қаракөздері де бар екендігін айтады. Бәріне бірдей аналық қамқорлығын аямай өсіріп жатқан кең пейілді жанның бұл әрекеті үлгі алуға тұрарлық.
Осылайша өрбіген сессия отырысынлда Мемлекеттік ұлттық саясатты іске асыру, ҚР-дағы қоғамдық-саяси тұрақтылықты қамтамасыз ету, мемлекеттік және азаматтық қоғам институттарының этносаралық қатынастар саласындағы өзара іс-қимылының тиімділігін арттыру бағытындағы облыс тұрғындарына арналған үндеу жарияланды. Ал мұнан соң облыс әкімі сессияны қорытындылап, ОҚО-тық Қазақстан Халқы Ассамблеясының жаңа төраға орынбасарларын бекітті . Сонымен бұл лауазымдарға облыстық татар-башқұрт этномәдени бірлестігінің төрайымы Ася Мухамедова мен Облыстық түрік этномәдени бірлестігінің төрағасы Латипша Асановтар тағайындалды. Оңтүстік Қазақстан облыстық Ассамблеяның 19 сессиясында облыс әкімі Бейбіт Атамқұлов алдыға жаңа міндеттер қойды. Ал оны жүзеге асыру ісіне өңіріміздегі Ассамблея құрылымы белсене қатысуы тиіс. Татулық пен бірліктің бірегей моделін қалыптастыруда маңызды рөл атқарып отырған Ассамблеяның 19 сессиясы соңы концерттік бағдарламаларға ұласты.
Абай Омар
