Кеше 9 маусым күні ОҚО әкімінің орынбасары Жақып Бөкенбаевтың төрағалығымен селекторлық мәжіліс өтті. Мәжіліске облыстың барлық басқарма басшылары мен аудан әкімдерінің орынбасарлары және коммуналдық мекемелердің басшылары қатысты. Жиналыста облыстың 2016-2017 жылдардағы жылу беру маусымына дайындық барысы, облыстағы террористік тұрғыдан осал объектілердің қажетті қауіпсіздік деңгейін қамтамасыз ету, сондай-ақ, өңірдегі көпқабатты тұрғын үйлердің апатты жағдайлары мен сейсмонығайту мәселелері қаралды.
Облыс әкімінің орынбасары Жақып Құттыбекұлы өңірдегі бюджеттік мекемелердегі жылу жүйелерін гидравликалық сынақтан өткізу жұмыстарының дайындығы тиісті дәрежеде жасалмаған барлық салалық мекемелерге қатаң тапсырма беріп, аталмыш жұмыстарды тез арада шешу керектігін айтты. Жиынды қорытындылаған облыс әкімінің орынбасары Ж.Бөкенбаев облыстағы көпқабатты үйлердің сейсмонығайту мәселелері жөнінде тиісті жұмыстарды атқармаған бірқатар аудандарға ескерту айтты. Мәселен, апатты үйлерді анықтап, үйлердің тұрғындарын уақытша тұрғын жаймен қамтамасыз етіп, апатты үйлерді бұзу жұмыстарын өз деңгейінде ұйымдастырмаған Шымкент, Кентау қалалары мен Түлкібас, Отырар, Созақ аудандарының әкімдерінің орынбасарларына аталмыш жағдайларды қолға алу керектігін баса айтты.
