Биыл өңіріміздегі Сайрам-Өгем мемлекеттік ұлттық табиғи паркіне 10 жыл. 2006 жылы 26 -қаңтарда Үкіметтің қаулысымен құрылған мекеме Тянь-Шань тау сілемдерінің табиғи байлығын сақтап қалуға негізделген. 150 мың гектарға жуық аймақты қамтитын паркте Қызыл кітапқа енген сирек кездесетін аң-құстармен қатар, өсімдіктер әлемінің де айрықша дүниесі сақталған.
Түлкібас, Төлеби және Өгем орман шарушалықтарын біріктірудің нәтижесінде құрылған Сайрам-Өгем паркі табиғат ресурстарына аса бай. Онда сүтқоректілердің 59, құстардың 300-дей түрі мекен етсе, 1600-ден аса сан алуан өсімдіктер бар. Олардың қатарында әсіресе айрықша қорғауға алынған аю, сілеусін, қар барысы, арқар, сондай-ақ, қыран құстар да кездеседі. Осы он жылдың ішінде табиғат қорғаушылары ерекше қорғауға алынған аймақты қаз-қалпында сақтап қалуда белсенділік танытып отыр. Олардың еңбегі онжылдыққа орай ұйымдастырылған конференция барысында атйылған нәтижеден көрінеді. Барша тіршілік әлемінің анасы саналатын табиғатты қорғауға атсалысқан азаматтарға жиынға келген қонақтар өз ризашылықтарын білдірді.
Әрине, Сайрам-Өгем паркінің қызметкерлері бүгінгі көрсеткішпен ғана тоқталып қалмақ емес. Табиғатта сирек кездесетін немесе жойылып бара жатқан тіршілік иелерін сақтап қалу бір басқа да, оны ел игілігіне іске асыру жолын қарастыру да өз алдына мәселе. Осы мақсатта ұжым туризм саласын жандандыруға күш салмақ.
Әбдімүтәлі Жұмаш
