23 тамыз – Ресей Федерациясы, Тверь облысы, Зубцов қаласының жау қолынан азат етілген күні. Сұрапыл соғыс айналып өтпеген бұл жер 1941 жылдың күзі мен 1942 жылдың жазында қарсылас қос елдің шабуылдары қызған жер. Елін қорғаймын деп жырақта қаншама жауынгер жер жастанса, олардың арасында белгісіздер тізімін толтырғаны қаншама. 2013 жылдың тамызында тағы 50- ге жуық боздақтың аты-жөндері анықталып отыр. Олардың арасында Қазақстаннан майдан даласына кеткен 6 азаматтың, 2-уі оңтүстікте туылғандар.
Зубцов ауданынан 40 шақырым жердегі Веригино елдімекеніне Оңтүстік Қазақстаннан бір топ делегаттарды бастап облыстық мәслихаттың депутаты Дулат Әбіш барды. Ал, «Айғақ» телеарнасының түсірілім тобы Ұлы Отан соғысы жылдарында қайтыс болып, бүгінге дейін аты-жөндері анықталмаған тұлғаларды дәстүрге сай қайта жерлеу рәсімін қатысып, арнайы фильм түсірді.
Сайрамдық Тұрғынов Қамбархан мен Бәйдібек ауданының тұрғыны Ерхан Сұлтанқұлов, араға 71 жыл салып аталарының қаза тапқан жеріне келіп отыр. Екеуі де майданға аттанған күннен бері хабар-ошарсыз болған Байназаров Байтей мен Сұлтанқұл Ерденовтың немерелері. 1895 жылы туылған Байназаров Байтей Сайрам ауданындағы Қайнарбұлақ ауылынан болса, Ерденов Сұлтанқұлдың ұрпақтары Бәйдібектегі Қайнабұлақ ауылында ғұмыр кешуде. 2013 жылдың мамыр айында екі отбасының жылдар сарылып іздегені табылды. Қазақстандық 6 азаматтың сүйегін Алексей Кузнецов басқаратын «Броня» іздестіру тобы тапқан. Зубцов ауданында 2001 жылдан бері осындай сауапты іспен айналысып келе жатқан топ басшысы биылғы шараға көршілес қазақ елінен батырлар ұрпағының көптеп келгенін ерекше атап өтті. 
Веригино елдімекеніне бұл күні бабасын іздеп оңтүстікқазақстандық делегациядан бөлек Балхаш қаласынан да бір топ қандастар келді. 75 жастағы Күләш Найзабекова 1942 жылы соғысқа кеткен әкесінің сүйегін таптық деген хабарды естігенде, бірден осында келген. Міне, араға 71 жыл салып әкесін қайта жер қойнына тапсырып отыр. Салтанатты шараға қатысқан жауынгерлер ұрпағына ата-баба бейітінің басынан бір уыс топырақ пен есімі жазылған гильзасы естелікке табыс етілді.
Веригино маңындағы буаырластар зираты биыл тағы 487 азаматпен толығып, Ржев түбіндегі қанды шайқаста белгісіз болып кеткен жауынгерлердің тізімі 54 есімге қысқарды. Жырақтағы отбасын, бала-шағасын, ұшқан ұясын тастап, отан үшін от кешуге аттанып, опат болған қаншама боздаққа туған жердің топырағы жарты ғасыр уақыт өткен соң, бұйырды.
23.08.2013 жыл
Эльвира Ортаева
