Шымкентте мүмкіндігі шектеулі азаматтарға өз деңгейінде қамқорлық көрсетілуде. Соның дәлелі ретінде шаһар аумағында «әлеуметтік такси» және «инва-такси» көлік қызметтері жақсара түсті. Мұқтаж азаматтар 43-36-77, 43-32-30 («инва-такси»), 28-38-98 («әлеуметтік такси») байланыс телефондары арқылы бұл қызмет түріне оңай қол жеткізе алады (қызмет көрсету уақыты сағат 9.00-ден 19.00-ге дейін). Қазіргі таңда облыс аумағында жеті инва-такси болса, жекелеген 24 әлеуметтік такси жұмыс атқарып отыр. Жаяу жүргіншілер жолағынан өте алмайтын мүмкіндігі шектеулі азаматтар үшін қала әкімінің тікелей қадағалауымен Т. Рысқұлов даңғылындағы жаңадан тұрғызылған жолүсті өткелінде арнайы мүгедектерге арналған жеделсаты орнатылды.
Алдағы уақытта қаланың тұрғындары жиі жүріп-тұратын жол бөліктерінде осындай құрылғылар орнату жоспарланған. Қала әкімдігінде өткен жиында шаһар басшысы Ғ. Әбдірахымов әкімдік қызметкерлеріне арыз-шағым жиі түсетін мекен-жайларға барып, тұрғындардың талап-тілектері бойынша тиісті жұмыстарды қолға алу қажеттігі жөнінде тапсырма берді.
