Психологиялық қызмет көрсету және дағдарыстың алдын алу бөлімі ашылды

Бүгін Шымкент қаласындағы облыстық «Жастар ресурстық орталығы» КММ-нің ғимаратында Оңтүстік Қазақстан облысының жастар саясаты мәселелері жөніндегі басқармасының «Жастар ресурстық орталығы» КММ-нің психологиялық қызмет көрсету және дағдарыстың алдын алу бөлімінің ашылуы салтанатты жағдайда болып өтті. Аталмыш бөлім Оңтүстік Қазақстан облыстық прокуратурасының ұсынысымен ашылды.  Шараға ҚР Білім және ғылым министрлігінің жастар саясаты департаментінің басшысы Кәрібжанова Роза, облыс әкімінің орынбасары Ұласбек Сәдібеков, облыс прокурорының орынбасары Әлімбеков Мұрат, облыстық жастар саясаты мәселелері жөніндегі басқармасының басшысы Болат Жанәбіл, облыстық денсаулық сақтау басқармасының басшысы Пакеев Сейтжамал, облыстық жәнеқалалық білім басқармасының бас мамандары, облыстық «Салауатты өмір салтын қалыптастыру» ЖШС-нің басшысы Ақатаев Сейділдахан және облыстық «Жастар ресурстық орталығы» КММ қызметкерлері мен БАҚ өкілдері қатысты.
Бөлімнің мақсаты – жастардың бойына рухани адамгершілік қасиеттерді ұялату, оларды салауатты өмір салтына шақырып, нәтижелі қарым-қатынас орнатуды үйрету, негативтен позитивке ауысуға көмектесу, бүгінгі таңда маңызды рөл атқаратын эмоциялық ерік сфера дағдысын психологиялық тұрғыда қалыптастыруда әрекеттер жасау болып табылады.
Терапиялық кабинет республика көлемінде алғаш рет Шымкент қаласында ашылып отыр. Бұған дейін психологиялық көмек көрсету Қызылордада қолға алынған екен. Бірақ көрші облыста арнайы кабинетте емес, телефон және тренажер залы арқылы көмек көрсетіліп келеді.
Алдағы уақытта арнайы керекті жабдықтармен жабдықталған бөлімде 5 адам жұмыс жасайды. Оның төртеуі психологтар болса, біреуі бөлім басшысы. Олар облыстағы 14 пен 29 жас аралығында дағдарысқа түскен жастарға психологиялық көмек көрсетіп, жоғары және орта арнаулы оқу орындарының жастары мен мектеп жасындағы жастар арасында түрлі психологиялық жаттығуларды ұйымдастырады, сондай-ақ арнайы тренингтермен семинарлар, дөңгелек үстелдер мен кездесулер өткізу, мұқтаж жандарға консультативтік кеңес беру, жас отбасыларға отбасы құндылығын түсіндіру, тұрақты шешім қабылдауға, тұрақты демографияны қалыптастыруға түсіндірме сабақтарын ұйымдастырумен айналысады. Бөлім басшысы Пернебай Гүлжазира болашақта нәтижелі жұмыс жасау үшін жоспармен әрекет жасайтынын айтты.
ОҚО «Жастар ресурстық орталығы» КММ-нің басшысы Ерлан Айтбаев бүгінде ыстық желіні іске қосу жұмыстары жүргізіліп жатқанын айтты. Алғашқыда 9 сағат бойы тегін психологиялық кеңес береді деп күтіліп отырған ыстық желі болашақта жұмыстың нәтижелілігніе қарай ұзағырақ жұмыс жасауы мүмкін.
Бөлімді ашу үшін бюджеттен 15 млн теңге қаржы бөлінген. Жаңадан ашылған бөлім көздеген нәтижеге қол жеткізу мақсатында облысымыздағы өзге де аудан, қалалардағы «Жастар орталығы» жанындағы және мектептердегі психологтармен тығыз қарым-қатынас жасауды көздеп отыр. Сондай-ақ кездесу барысында барлық қонақтар мен сала мамандары өздерінің ойларында жүрген сауалдарын қойып, туындаған сұрақтарға жауап іздеп, ойларындағы ұсыныстарымен бөлісті.