Өмірінің соңына дейін Оңтүстік Қазақстан облыстық балалар ауруханасында қызмет атқарып, Оңтүстік Қазақстан Медициналық Фармацевтикалық академиясында факультет деканы болған Ағабек Қарабекұлының еңбегі ел есінде. ҚР Мемлекеттік сыйлығының лауреаты, 2015 жылдың — Ең үздік жыл өнертапқышы, Бәйдібек ауданының «Құрметті азаматы», м.ғ.д., әрі профессор, ғалымның балалар хирургиясында алар орны ерек. Өйткені, көптеген ғылыми еңбектері салада кеңінен қолданылып келеді. Әсіресе, «Кеуде клеткасының шұңғыма тәрізді деформациясын жедел емдеу тәсілі» де медицинада өріс алған. Туған жері қазіргі Ордабасы ауданы, Бөген су қоймасының мәңгілікке жай тапқан асылы мекенінде мәрмәр тасқа есімі ардақталып жазылған белгітас орнатылды. Рухына құран бағыштаған жақындары қауым елге дастархан жайды.
Алматы Мемлекеттік медицина институтының педиатрия факультетін үздік тәмамдаған Ағабек Қарабекұлы алғашқы еңбек жолын Целиноградта бастады. Ұзақ жылдар бойы Алматы қалалық балалар ауруханасында еңбек еткен. Өмірінің соңына дейін Оңтүстік Қазақстан Медициналық Фармацевтикалық Академиясында балалар хирургиясы мен травматология, анестиозология және реонимотология кафедрасының меңгерушісі әрі медицина факультетінің деканы болған. Бірге оқыған жұбайы Әлиямен 1972 жылы шаңырақ көтеріп, 3 қызды тәрбиелеп өсірді. Немере сүйді.
Медицина ғылымдарының докторы, профессор, Ағабек Қарабековтің шәкірттері бүгінде республиканың түкпір түкпірінде еңбек етуде. Балалар хирургиясының елімізде дамуына өзіндік үлесі бар Ағабек Қарабекұлы Бүгінгі күнге дейін 256 ғылыми еңбектің авторы атаныпты. 1981 жылы Кеңестер Одағының «үздік өнертапқышы» 1999 жылы балалар травматологиясы мен ортопедиясына енгізген диагностикалаудың және емдеудің жаңа технологиялары үшін Қазақстан Республикасы Үкіметінің ғылым және білім техника салалары бойынша ерен еңбегі үшін Мемлекеттік сыйлығының Лауреаты атанады. 2002 жылы «Қазақстан Республикасының денсаулық сақтау ісінің үздігі» деген төс белгісімен марапатталса, 2003 жылы Республикалық «Жыл маманы» конкурсында «Педагог – ғалым» номинациясының жеңімпазы болған. 2012 жылдың «Үздік ғалымы» Сондай-ақ, Ағабек Қарабекұлының ғылыми еңбегі, «Шапағат-2015» республикалық өнертапқыштар байқауының «Ең үздік жыл өнертабысын» иемденген.
Балалар хирургиясында Қазақстан тарихында Мемлекеттік сыйлыққа қол жеткізген Ағабек Қарабекұлы Камал Ормантаевтан кейінгі екінші дәрігер еді. Барша қазақ баласының қиналғанда жанына табылып, ата-ананың қуанышын еселей түсетін, үмітіне сенім ұялататын ардақты ұстаздың әрбір ісі бүгінгі қоғам үшін қымбат еді. Амал қанша, осындай бар қасиетті бойына жинаған кең пейіл, жаны жомарт, жайсаң азаматтың топырағы торқа жаны жәннаттан болсын дейміз!
Салтанат Тойболова
