Оңтүстік өңірі шағын және орта бизнес секторының дамуы бойынша республикада көш бастап тұр. Жалпы жұрттың кәсіпкерлік саласына дендеп енуі еңбекқорлықтың негізгі қайнар көзі болса, маңызды бұл саланың өркендеуі экономиканың басты тетігі. Ауылшаруашылығы, жылыжай өндірісі, тамшылатып суару – өңір шаруалары үшін таңсық іс емес. Шымкентке арнайы сапармен келген «Атамекен» ҰКП Президиумының төрағасы Тимур Құлыбаев аймақтың даму әлеуеті жоғары екендігін тағы бір айқындап өтті. Әуелі көршілес Сайрам ауданында шаруа қожалықтарының жұмысымен танысып, кәсіпкерлерге орталық тарапынан көрсетіліп жатқан қызметтің анық-қанығын жеке өзі бақылаған. Нәтижесі – әрине көңіл қуантады.
Шағын және орта бизнестің әсіресе, Оңтүстік өңірінде табанды дамуы – ауа райының шаруаға қолайлылығымен де ерекшеленеді. Сол себепті, республикадағы өзге де облыстарда саланы дамыту тетігін өркендету үшін 7 бірдей негізгі проблемалардың блогын палата өкілдеріне ұсынып отыр. Мемлекеттік сатып алу саласында отандық тауар өндірушілерді қолдау, 2017 жылдан кейін Арнайы экономикалық аймақтардағы преференцияларды жалғастыру туралы мәселелері де қозғалды.
Оңтүстік өңірінің балқаймақтары, кәсіпкерлік саласының дамуында ғана емес, отандық өнімнің негізі, экономиканың күретамырына айналып отырған мекемелер де бар. Облыс әкімі Бейбіт Атамқұлов кәсіпкерліктің өрісін кеңейтіп отырған кәсіпорындарға жекелей тоқталып, жетістіктерін де саралап өтті. Мәселен, «Стандарт-Цемент» – Қазақстан нарығында цемент өндіруші және қажеттілікпен қамтамасыз ететін ірі нысанға айналып отыр. «Ордабасы құс» та, ішкі сұраныстың бірден бір көзі және үндік етін Ресейдің 30 пайыз нарығына экспорттап жатыр. Ал, туризм саласындағы алыптар «Eсovilage Қасқасу», «Сарыағаш» шипажайлары келушілерді құшақ жая қарсы алады. Еліміз бойынша индустриалдық аймақтарды дамыту жобасы қарқынды жүзеге асырылып жатыр. Шымкентте бұл мәселе оңды шешімін тапқан. Жекенің меншігінде кеткен каналдарды қайтару да оңайға соқпайды. Бұл арналардың жұмысын жандандыру арқылы жоспарлы түрде ауылшаруашылығының дамуына негіз болмақ. Көпшіліктің қарсылығына қарамастан Мақтаралда алғашқы кооперация құрылды. Енді бұл аймақта ғылыми зерттеу институтының бөлімдері ашылып, құрылымдалатын болса, шаруашылықтың негізгі тетіктерін зерттеуге мүмкіндік аламыз. Алдағы уақытта барлық аудан-қалада бұл жұмыстар ретімен жүргізілетін болады. Иә, жиын қатысушыларынан белгілі болғандай, шағын және орта бизнесті құру мен дамытуда ОҚО ең қауіпсіз аймақ. Жобаңыз болса болғаны. Микрокредиттік ұйымдар арқылы жоспарыңызды қаржыландырып, әрі қарай шаруаны дөңгелетіп кету тек өзіңіздің қолыңызда. Сондықтан іске сәт!
Салтанат Тойболова
