20 сәуір күні Еуразиялық Медиа форум өз жұмысын бастады. Яғни, шараның алғашқы күнінде Астанаға әлемнің 50 елінен келген 400-ден астам саясаткерлер, ғалымдар мен сарапшылар, қоғам қайраткерлері, журналистер және экономистер тіркеуден өтіп, шеберлік сағатына қатысты. Ұлыбританиядан келген тәуелсіз саяси кеңесші жүргізген шеберлік сағатында дұрыс имидж қалыптастырудың жолдары талқыланды. Үш күнге белгіленген ашық пікір алаңда жаһандағы шиеленіскен жайттар сараланып, саяси тұрақтылық пен аймақтағы қауіпсіздікті сақтаудың тетіктері пысықталмақ. Елордада басталған ХІІІ Еуразиялық медиа форум қатысушыларына ҚР Президенті Нұрсұлтан Назарбаев құттықтау жолдады. Құттықтауды ҚР Премьер-Министрінің орынбасары, ЕАМФ ұйымдастыру комитетінің төрайымы Дариға Назарбаева оқып берді.
«Еуразиялық медиа форум қатысушыларын Қазақстан жері әрдайым құшақ жая қарсы алады. Форум әлемнің жетекші диалог алаңдарының біріне айналды. Онда қазіргі заманның ең өзекті мәселелері талқыланады. Дамудың жаңа парадигмалары қалыптасып, болашақтың сұлбасы жасалады. Бүгінгі таңда әлем барша адамзатқа теңдессіз сын-қатерлер төндірген жаңа дәуірге аяқ басады. Жаңа әлемнің, бәріміздің ортақ болашағымыздың қандай болатыны біздің әрқайсымызға байланысты. Мен «Әлем. ХХІ ғасыр» атты манифесті ұсындым. Оның мақсаты — Жер бетінде соғыс атаулыны түп-тамырымен жою. Бұл ғасыр ортақ ерік-жігер арқылы парасат пен жасампаздық сындарлы диалог салтанат құратын дәуір болуы тиіс. Сол себепті, Еуразиялық медиа форумның алаңында қордаланған әлемдік проблемаларды ашық талқылап, теңгерімді шешімдер іздестіру бейбітшілік жолындағы жалпы әлемдік қозғалысқа қосылар баға жетпес үлес. Форум жұмысының нәтижесі, сіздердің жаңа идеяларыңыз бен бастамаларыңыз дүниежүзілік коммуникацияның жаһандық диалогты дамытуға зор серпін береріне сенімдімін. Форумның барша қатысушыларына жемісті жұмыс пен бар жақсылықтарды тілеймін», — делінген ҚР Президентінің құттықтауында.
Жыл сайын ауқымды шараға қатысуға ниет білдіргендердің қатары көбеюде. Бұл осымен XIII рет өткізіліп отырған Медиа форумның өзектілігі жыл санап артып келе жатқандығының айқын көрінісі. Шара барысында әлемдік саясатта салмағы бар бірнеше тұлға баяндама жасайды. Биыл сикерлер қатарында Ауғанстанның бұрынғы президенті Хамид Карзай, Риз Хан, Ұлыбританияның бұрынғы Сыртқы істер министрі Джек Стро сынды танымал саясаткерлермен қатар, Қазақстаннан саясаттанушы Ерлан Карин, Экономика және қаржы саясаты министрі Тимур Сүлейменов, Қауіпсіздік кеңесінің хатшысы Нұрлан Ермекбаевтар бар.
Ал, Астана төрінде өтіп жатқан Еуразиялық Медиа Форумға ОҚО-нан делегат болып барғандардың қатарында «Айғақ» Телерадиокомпаниясының президенті, облыстық мәслихаттың депутаты Дулат Әбіш, «Шаян» аудандық газетінің бас редакторы, Қазақстан Журналистер Одағының мүшесі Абзал Әділбеков, телеарнаның редакторы Салтанат Тойболова мен журналист Ботагөз Мәдібек, телеоператор Ақжол Рахманқұловтар бар. Айта кетейік, XIII Еуразиялық медиафорум тақырыбы «Қазақстан – бүгінгі геосаяси аренада өз орнын қалыптастырып келе жатқан жас мемлекет» деп аталады.
