Кентау қаласына 3 айдың ішінде 765 млн. теңгенің инвестициясы тартылған. Ауылшаруашылығы саласында да бірқатар өсім байқалады. Яғни, биыл 2100 га суармалы жерді игеру жоспарланса, бүгіннің өзінде 1470 га жер игеріліп үлгеріпті. Жалпы 100 нақты қадам аясында іске асып жатқан жүйелі жұмыстар мен тындырымды тірліктер туралы Кентау қаласының әкімі брифингте мәлімдеді. Кенді қалада өнеркәсіп өнімін өндірудің негізгі үлесі 2 ірі, 6 орта және 8 кіші кәсіпорындардың еншісінде. Мұның нәтижесінде жұмыссыздардың қатары азайып, халықтың әлеуеті де артып келеді. Жалпы Кентауда өнімнің көлемі жыл басынан бері 5 млрд. 167 млн-ға жеткен. Өз кезегінде индустриялды аймақ жобасы да қарқынды іске асып келеді.
Аймақтың әлеуетінің артуымен қатар, халықтың тұрмыс тіршілігінің түзелуі мақсатында инфрақұрылым жұмысының 2-ші кезеңі бастау алыпты. Моноқалалар қатарына кіретін Кентауда инвестициялық жобаларды іске асыруға бөлінген 800 млн. теңге «Болашақ», «Батыс», «Жұлдыз» мөлтекаудандарының инженерлік-инфрақұрылымдарының құрылысына бағытталып отыр. Ал, биыл 7 бірдей білім ұясы күрделі жөндеуден өтсе, коммуналдық салаларда кезең кезеңімен іске асып, проблемалар шешіліп келеді. Кентау қаласында жұмыссыздық деңгейі 5,5 пайызды құрайды. Яғни, ресми түрде тіркелген жұмыссыздардың саны 1448 адам. Мүмкіндігі шектеулі жандардың арасында тұрақты жұмыспен қамтылғандардың саны 3 айда 39-ға жеткен. Жыл соңына дейінгі жоспар 80 азаматты қамту көзделіпті. Басты жұмыс көзі саналатын трансформатор зауытының өнімі дағдарыстың салдарынан өтпей, бірқатар қиындықтар туындаса да мұнда жұмысшы саны қысқартылмаған. Қалада діни ахуал да тұрақты. Қоғамдық қауіпсіздікті сақтау үшін ақсақалдармен бірлесе әкімдік тарапынан жұмыстар жүйелі түрде атқарылып жатыр.
Еңлік Заманхан
