Шымкент қаласы әкімдігінің ұйымдастыруымен Наурыз мерекесі қарсаңында «Саиль Қошқар – Ата» атты көктем мерекесі өтті. Іс-шараның мақсаты қазақ халқының ежелгі үрдісін жандандыру, ұлттық салт-дәстүр мен әдет-ғұрыпты кеңінен насихаттауға бағытталған. Осы ретте киелі «Қошқар ата» өзенінің бойында өткен мерекелік шара барысында қазақтың ұлттық ойындарынан жарыстар ұйымдастырылып, әуезді әндер шырқалды. Шымкент қаласының тұрғындары ежелден «Саиль Қошқар – Ата» — «Көктем мерекесі» немесе «Асыл тұқымды қошқар мейрамы» мерекесін атап, ұлттық-дәстүрлі ойындар және сауық сайрандар өткізіп отырған. Сондай-ақ , киелі Қошқар-Ата өзеніне көркеюді және мал отардың аман-саулығын тілей отырып, қошқарды құрбандыққа шалған. Осылайша бір ғасырдан астам уақыт бұрын Қошқар ата өзенінің бастауында пайда болған бұл мереке Шымкент қаласына ғана тән. Осы орайда биыл қала әкімдігі тарих жылнамасында қалған аталмыш маңызы айрықша мерекені қайта жаңғыртып отыр. Яғни бұл күні өзен жағалауында өткен шараға қала тұрғындары көптеп қатысса, мерекеге байланысты бұл орынға асыл тұқымды қошқарлар көрмесі ұйымдастырылған. Ал ұлттық ойындарға әділ шешім шығару үшін арнайы қазылар алқасы да бекітілген.
«Саиль Қошқар – Ата» атты көктем мерекесін ұйымдастырудағы негізгі мақсат қазақ халқының ежелгі үрдісін жандандыру, ұлттық салт-дәстүр мен әдет-ғұрыпты кеңінен насихаттау болып табылады. Сондықтан да мереке басы ұлттық құндылықтарымызды дәріптейтін театрландырылған көріністермен бастау алды. Сондай-ақ, төл өнеріміз айтыстан жас ақындар сынға түсіп, шараның көркін қыздыра түсті. Бір ғасырдан астам уақыттан соң қайта жаңғырған айтулы мерекенің қонақтары бұл күні арнайы ұйымдастыурылған қолөнер бұйымдарының көрмесін тамашалап, спорттық ойындарға куә болды. Яғни шара барысында қол күресі, гір тасын көтеру, қазақша күрес сынды ұлттық спорт түрлерінен балуандар сынға түсіп өзара жүлделі орындарды сарапқа салды.
Ал мерекелік шарадағы ең басты жарыстың бірі қошқар көтеру сайысы болатын. Бұл сынға алдын ала жазылған білекті де жүректі жігіттер салмағы 85 келі тартатын қошқарды көтеруден сынға түсті. Ал жарыс нәтижесі бойынша үлкен қошқарды 32 мәрте иыққа салып көтерген Төлебилік балуан Біржан Досалиев жеңіске жетіп жүлдеге тігілген қошқарды жеңіп алды. Осылайша өрбіген мерекелік шара соңы концерттік бағдарламаларға ұласты.
Абай Омар
