Шымкентте еңбекші жастарға арналған жатақхана бой көтереді. Еңбек етіп, табыс табамын деген жалынды жастар мемлекеттік бағдарлама арқылы жұмысқа орналасып, жатақханамен қамтылуға мүмкіндігі бар. Ал еңбек күші жетіспейтін Солтүстік Қазақстан облысы оңтүстіктен барған 300 отбасыны баспанамен қамтамасыз етіп, тұрақты жұмыс орнына орналастыруға дайын. Бұл туралы ОҚО жұмыспен қамту және әлеуметтік бағдарламалар басқармасының басшысы Әсия Темірбаева ОҚО Аймақтық коммуникациялар қызметінде өткен брифингте мәлімдеді.Елімізде«Жұмыспен қамту-2020» бағдарламасына ұлттық қордан 63 млрд. теңге бөлінсе, Оңтүстіктің үлесіне барлығы 14,3 млрд. теңге бұйырып отыр. Мемлекеттік бағдарламалар арқылы екі қолына бір күрек іздеген азаматтарға барлық мүмкіндік жасалған. Ең бастысы білікті мамандардың жұмыс орнын сақтап қалуына іс-шаралар жасалуда. Яғни, кадрлардың жұмыс уақыты мен еңбекақысы қысқарған жағдайда үштен екі мөлшерінде уақытша субсидияларға 17,3 млрд. теңге бөлініп отыр. Айта кетейік, 2015 жылы 613 адам қысқартуға ұшыраса, жыл басталғалы 75 еңбеккер жұмыссыздар қатарын толықтырған. Оңтүстіктегі еңбекші жастарға арналған 297 орындық жатақханаға қазына қаржысынан 377 млн. теңге бөлінді. Нысан ендігі жылы пайдалануға беріледі деп күтілуде. Аталған жатақханаға техника мамандығының иесі және индустриялды аймақта жұмыс істеуге ниетті жастар ғана келіп қоныстана алады. Облыс орталығына шалғайдан келіп жұмыс жасайтын жастар үшін бұл тиімді бастама. Басқарма басшысының айтуынша, биыл облыста мемлекеттік салалық бағдарламалар шеңберінде 47 684 жаңа жұмыс орындары ашылу жоспарлануда. Құрылатын жаңа жұмыс орындарының 4320 – «Нұрлы жол» бағдарламасы, 600-ге жуық орын «Индустриалды-инновациялық даму» бойынша, 210 орын «Агробизнес 2020 жол картасы», 16 мыңға жуығы мемлекеттік салалық бағадарламалар аясында, 4 мыңнан астамы «Жұмыспен қамту 2020 жол картасы», ал 22 152 орын «Өңірлерді дамыту» бағдарламасы шеңберінде құрылмақ. Ал облыста жыл басынан бері 11 мыңнан астам азаматпен әлеуметтік контракт түзілген. Оның 4508-і тұрақты жұмыспен қамтылса, 4165 адам әлеуметтік жұмыс орындарына, 2409 жастар практикасына, 141 адам ақылы қоғамдық жұмысқа жолданған.
Еңлік Заманхан
