Облыс әкімі Орталық коммуникация қызметінде брифинг берді

Бүгін өңір басшысы Бейбіт Атамқұлов ҚР Президенті жанындағы Орталық коммуникация қызметінде брифинг берді. Онда облыс әкімі 2015 жылы өңіріміздің экономикалық және әлеуметтік салаларында атқарылған жұмыстары туралы баяндап, БАҚ өкілдерінің сауалдарына жауап берді. Айта кетейік, облыстағы атқарылып жатқан жұмыстардың барлығы Елбасының халыққа арнаған Жолдауы аясында және Ұлт жоспары — 5 институционалды реформаны іске асырудың «100 нақты қадамындағы» міндеттердің шеңберінде жүзеге асуда. 2015 жылдың қорытындысы бойынша облысымыздың әлеуметтік-экономикалық дамуында өзгеріс бар. Мәселен, жалпы өңірлік өнім бойынша өткен жылы болжамды 2% өсімді құрады (республикадағы орта есеп 1,2 %). Сонымен қатар, былтыр өнеркәсіп саласында 668 млрд. теңгенің өнеркәсіп өнімі өндірілсе, бұл 2014 жылмен салыстырғанда 64,4 млрд. теңгеге артық. Бұл көрсеткіш бойынша Оңтүстік Қазақстан елімізде алғашқы бестікке кіреді.Өңірде «Индустриалды-инновациялық даму» бағдарламасы басталғалы құны 228,5 млрд. теңгені құрайтын 164 жоба іске қосылып, 14 мыңға жуық жұмыс орны ашылды. Іске қосылған жобалардың 94% жоспарланған қуаттылықтың 90-100%-на жетті. Бұл көрсеткіш бойынша өңір республикада алдыңғы қатарда. Ал индустрияландыру картасының екінші бесжылдығында 869 млрд. теңгені құрайтын 115 жобаны іске қосу жоспарланып, нәтижесінде 20 мың жаңа жұмыс орны ашылатын болады. Есепті жылы инвестициялық құны 44,6 млрд. теңге болатын 27 жоба іске қосылып, 2,6 мың жұмыс орны ашылды. Олардың бірі жылына 2 млн. тоннаға дейін цемент өндіретін «Стандарт Цемент» ЖШС. Зауытта жаңа М-600 маркалы, сондай-ақ, «құрғақ» энергиялық үнемді тәсілмен нығыздалған цемент өндіріледі. Кәсіпорында 450 адам жұмыспен қамтылған. Ал келесі ірі өндірістің бірі шұлық бұйымдарын өндіретін «Алем БT» ЖШС. Жоба құны 2 млрд. теңге болатын кәсіпорында 170 азамат жұмыспен қамтылса, оның 30 пайызы мүмкіндігі шектеулі жандар. Жаңа технологияларды енгізу нәтижесінде, өңдеу өнеркәсібіндегі еңбек өнімділігі 1 адамға шаққанда 48 000 АҚШ долларын құрады. Бұл – 2014 жылмен салыстырғанда 18 пайызға артты. 2015 жылы өңірдің өнеркәсіп және кәсіпкерлік саласында 12 455 жаңа жұмыс орындары ашылды. Аймақта 2015 жылы жұмыс істеп тұрған шағын және орта кәсіпкерлік субъектілерінің саны 184 889 бірлікке жетті. Өңірдегі экономикалық белсенді халықтың төрттен бірі осы салада еңбек етеді. Осы шағын кәсіпкерліктің өсіп, өркендеуіне сеп болған ОҚО әкімдігі жанындағы «Кәсіпкерлерге қызмет көрсету орталығы». Бүгінде 15 аудан, қалада ашылған кәсіпкерлерге қызмет көрсету орталығы бір жылда 35 899 кәсіпкерге көмек көрсетіп, кәсіпкерлік мектептерінде 7193 адам оқытылған. Ел экономикасын тұрақтандырып, дамытудың тағы бір жолы – инвестиция тарту болып табылады. Өткен жылы облыс экономикасына 416 млрд. теңге инвестиция тартылған. Қазір аймақта шетелдік компаниялардың өкілдерімен бірлескен 42 жобаның іргетасы қаланды. 2015 жылы жалпы құны 32,3 млн АҚШ долларын құрайтын 4 жоба іке қосылды.