20 наурызда өтетін саяси додаға қатысатын кандидаттардың тізімі нақтылануда. Алдымен «Нұр Отан» партиясы атынан облыстық мәслихат депутаттығына үміткерлер сынақтан өтіп, праймеризде бақ сынады. Яғни көшбасшы партия мүшелері Бәйдібек ауданы №20 сайлау округінен депутаттыққа үміткерлердің арасынан ауданның әлеуеті мен экономикасын көтеруге атсалысады деп таңдау жасады.
3 мыңнан аса партия мүшесі бар Бәйдібек ауданының халқы Шаяндағы мәдениет үйіне жиналды. Мақсат партияішілік кіші сайлау арқылы №20 округтен облыстық мәслихат депутаттығына «Нұр Отан» партиясы атынан сынға түсетін бір үміткерді анықтау. Аудан халқының мүддесін көздеп, өзекті мәселесін шешуге білек сыбана кірісуге үміттілердің қатарында қазіргі таңдағы дәл осы округтің депутаты Спандияр Бекжігітов пен облыстық мәслихаттың депутаты Шәріпбек Жамалбек, «Нұр отан» партиясының мүшесі Пернеев Исмайл бар.
Ауданның қос перзенті, облыстық мәслихаттың 5 шақырылымның депутаттары қоғамдық жұмыста белсенді, «Азаматтық Альянс» қауымдастығының президенті Шәріпбек Жамалбек пен облыстық кардиоорталықтың бас дәрігері Спандияр Бекжігітов яғни үміткерлер халыққа өз тұғырнамаларын таныстырды. Партия мүшелерінің дауыс беруі арқылы партия атынан сынға түсетін үміткерді анықтаған праймеризде айқын басымдықпен 5 — ші шақырылымның депутаты Шәріпбек Жамалбек жеңіске жетті. Яғни бастауыш партия ұйымдарының 275 мүшесі қатысқан сайлау қорытындысы бойынша 208 дауысқа ие болған Шәріпбек Жамалбекұлы 20 наурызда өтетін сайлауға партия атынан қатысатын болды. 
