Жыл басынан бастап әкімшілік құқық бұзушылық үшін салынатын айыппұл соммасы мен жаза көлемі де өзгерді. Яғни жол ережесін бұзу жәйттері мен қоғамдық орындарда тәртіпсіздік жасағандар үшін биылғы жылдың айыппұл мөлшерлері қандай? Осыған орай ең жиі кездесетін әкімшілік айыппұл мен жаза түрлерінің 2016 жылғы мөлшерін ОҚО ІІД әкімшілік полиция басқармасы басшысының орынбасары Алмасхан Тастанбеков мәлім етті. ОҚО ІІД әкімшілік полиция басқармасы басшысының орынбасары Алмасхан Тастанбеков көптеген айыппұлдар көлемі өткен жылғы мөлшерінде қалса, есесіне кейбір айыппұлдар соммасы біршама өсіп отыр екен. Бұл көбіне жол ережесін бұзатын көлік жүргізушілеріне қатысты. Айталық белгіленген жылдамдықты сағатына 10-20 шақырым асырсаңыз 21 мың 210 тенге айыппұл төлейсіз. Ал жылдамдық сағатына 40 шақырымнан асса 63 мың 630 тенгеге көлеміндегі айыппұл салынады. Қауіпсіздік белбеуін тақпаған жағдайдағы айыппұл 10 мың 605 тенгені құрайды. Сондай-ақ, тыйым салынған жерден бұрылу немесе артпен жүрудің құны 21 мың 210 тенге шамасында. Десе де салынған айыппұлды 7 күн ішінде төлеген жағдайда 50 пайыздық жеңілдікке ие бола аласыз. Яғни бір апта ішінде айыппұл төлеушілер тиісті сомманың жартысын төлеп құтыла алады. Осылай деген әкімшілік полиция басқармасы басшысының орынбасары салынған айыппұлдарды өндіру көрсеткіштері де жыл санап артып отырғандығын айтады. Мәселен 2014 жылы нақ осы әкімшілік айыппұлдар есебінен 1 млрд. 380 млн. тенге қазынаға түссе, 2015 жылы 252 мың 675 әкімшілік құқық бұзушылықтар тіркеліп, 2 млрд. 315 млн. тенгенің айыппұлдары өндірілген. Сондай-ақ, Шымкент қаласында орнатылған жалпы саны 23 жылдамдық өлшеуші құралдар мен негізгі көше қиылыстарына орнатылған 11 зияткерлік бақылау жүйелерінің анықтауымен түскен айыппұлдар көлемі өткен жылы 830 млн тенгені құраған. Осылай деген Алмасхан Мамбетұлы жыл санап ОҚО-да жол көлік апаттарының азайып отырғандығын айтады. Мәселен, 2014 жылы өңір жолдарында 3370 жол апаты тіркеліп, 432 адам қаза тапса, 2015 жылы тіркелген жол апаттарыны саны 2251-ді құрап отыр.
Абай ОМАР
