Оңтүстікте желтоқсан айының соңғы күндері көптеген қиындықтарды тұғызды. Қар басу, боран, күшті жел сияқты табиғи құбылыстар азаматтық қорғау қызметтерінің жұмыстарын күрделендіре түсті. Облыстың автожолдарында құтқару жұмыстары туралы бірінен кейін бірі ақпараттар түсе бастады.
2015 жылғы 23 желтоқсанда сағат 18.30-дан бастап Бәйдібек ауданында «Шолаққорған-Шаян» автожолының 598-606 км ОҚО ТЖД «Жедел құтқару жасақтың» күштерімен қар құрсауынан 7 техника шығарылды. Зардап шеккендер жоқ. Құтқару операциясында жасақтың 10 құтқарушысы қатысып, 3 техникасы жұмылдырылды. Сол күні бір уақытта ОҚО ТЖД «Өрт сөндіру және авариялық-құтқару жұмыстары қызметінің» күштері авариялық-құтқару жұмыстарын басқа бағытта жүргізді. Жамбыл облысының Жуалы ауданында сағат 18.30-дан бастап «Алматы-Ташкент-Термез» республикалық маңызы бар автожолдың 593 км Шақпақ ата асуында Оңтүстік Қазақстан облысының өртке қарсы қызметінің 4 адам жеке құрамы және 1 техникасы қар құрсауынан 9 техниканы шығарып, 30 адамды эвакуациялады. Зардап шеккендер жоқ.
Бір күн бұрын 22 желтоқсанда сағат 19.00-ден 23 желтоқсан сағат 07.30-ға дейін құтқару жұмыстары «Кентау-Шолаққорған» облыстық маңызы бар автожолының 44 км жүргізіліп, қар құрсауынан 83 адам және 6 техника құтқарылды. Құтқару жұмыстардың нәтижесінде оңтүстікте қар басудан жалпы 113 адам эвакуацияланды және 22 техника шығарылды.
