Киелі Қазығұрт тауының етегінде жатқан қауым үшін үлкен қуаныш орын алды. Төлеби ауданының Кемеқалған ауыл округіне қарасты Абай ауылының жамағатына тұрғызылған мешіттің лентасы қиылып, алғашқы мінәжат жасалды. Оңтүстіктің игі жақсылары мен республикамызға танымал тұлғалардың басын қосқан ашылу рәсімі ел аманатын осылайша орындады. Халқының жанашырына айналып отырған жеке кәсіпкер Әсет Қайыпбековтің демеушілігімен бой көтерген «Аманта» мешіті Іле Алатауының сілемдеріне жалғасқан Қазығұрт тауымен керемет үйлесім тапқан.
Мемлекеттік сыйлықтың лауреаты, техника ғылымдарының докторы, профессор, академик Асқар Құлыбаев, ҚР Мұсылмандар діни басқармасының төрағасы, еліміздің бас мүфтиі Ержан қажы Малғажыұлы, Оңтүстік Қазақстан облысының «Құрметті азаматы» Мүсілімбай Дайырбековтер арнайы келіп, алдымен сәждеге бас қойды. Өңірдің зиялы қауым өкілдері де бүгінгі қуаныштың төрінен орын алды.
Абай ауылының өз биігінен орнын тапқан зәулім мешіттің күмбезі аспан көкпен таласқан. Бұған дейін ауыл азаматтарының тағзым жасайтын арнайы орны тарлық етіп келді. Осыны ескерген Абай топырағының тумасы азаматтығын танытып, көпшілікке қуанышын сыйлап отыр. Күні кеше борандатып, ақ ұлпа жауған түннің ашуы сейілген, күннің көзі нұрын төгіп тұрды. Мұның өзі пейілі кең жанның жанашырлығын әйгілегендей. Бұл мешіттің «Аманта» аталуының өзіндік себебі бар. Заманында ұшқыр ойлы, қоғамының тәрбиешісі, данагөй ақылшысы бола білген бабаның рухын ұлықтау. Мейірімділік пен ізгіліктің нұрын жүректерге жеткізген қасиетті орынның болашақ ұрпағы үшін маңызы зор. Баба аманатын жалғастырған бүгінгі жас Әсет Әбдірашұлы қандай құрметке болсын лайық. Ынта-ықыласымен, жан жүрегімен облыстың әрбір түкпірінде өзіндік қолтаңбасын қалдыруда. «Сити строй» салған құрылыс нысандары әлеуметтің қажетіне жарап отыр. Тәуелсіздіктің 20 жылдығына тарту етіліп, Шымкент қаласындағы саябақтың төрінде тұрғызылған жеті найза кешені «Сити Стройдың» үлесінде. Теміржол вокзалының аумағындағы 3 бірдей автожолды түйістірген «Жібек жолы» аталымындағы сағат композициясы да аймақтың сәулетін толықтырып тұр. Баба аманатын ұлықтаған тағы бір өнегелі іс халқының қорғаны, елінің біртуар батыры айналған Ақпан батырдың ескерткішінің бой көтеруі еді. Қала орталығында орын тепкен ескерткіш болашақ ұрпаққа ой салары сөзсіз. «Күншығыс» мөлтекауданында балалар үйін салып, ел игілігіне берді. Тұрғын үйлердің құрылысымен айналысып жүрген «Сити строй» корпорациясы үшін бірегей мәдениет ошағы «Түркістан» сарайының іргетасын көтеру алдымен оңайға соқпады. Бар күш-жігерімен, ынта-ықыласын төге отырып, тәжірибенің молдығын пайдаланған мекеме бұл жұмысты да абыроймен атқарды. Облыстық мәслихаттың депутаты ретінде де елге танылып, жұртшылықтың өтініш-тілегін орындап келеді. Осыны ескерген халық қалаулылары әріптесінің жасаған жақсылығын жамағатымен бөлісті.
Бақ дарыған құтты мекеннің баурайында алыстан менмұндалап тұрған «Аманта» мешіті ендігі ауыл азаматтарының іргелі орыны. Асқан жауапкершілік пен ауызбірлікті, мызғымас ынтымақтың ұйытқысына айналған қауым жиыны ыстық ықыластың нұрын төккендей. Бір-бірімен құшақ алыса амандасып, хал-жағдайын сұрасқан ізгі тірлікке көпшілік қолдау танытты. Лента қию рәсімі де көпшіліктің таныстырылымнан кейін өтіп, бір мезгілде құшағына 200-ден аса жамағатты сыйдырды.
«Талпынар сәтте талпынсаң, қыран құшса самғайсың» деген қазақта қанатты сөз бар емес пе? Сәтті қадамын жасаған ел азаматының арман-тілегінің бір бағыты орындалғандай. Келген жанды, ерекше дизайнымен баурап, көрінісі көзді талдырған заманауи үлгідегі мешіттің ендігі қызметі ұрпағына тәлім трбие беру мен қатар, ынтымақ бірліктің ордасы болмақ. Мешіт жанынан салынған саябақтың бір жартысы Ұлы Отан соғысының жауынгерлеріне арналады. Болашақта есімдері мәрмәр тасқа қашалып жазылып, ұрпағы мәңгі тағзым жасайтын қасиетті орынға айналары сөзсіз.
