Оңтүстік Қазақстан облыстық «Нұр Отан» партиясының жаңа төрағасы өз қызметіне кірісті. Өңір басшысы Бейбіт Атамқұловты жетекші партия төрағасының бірінші орынбасары Асқар Мырзахметов Елордадан арнайы келіп, кезектен тыс 24-ші конференция отырысында партия мүшелеріне таныстырды. Жиын барысында көшбасшы партияның алдағы атқарылар ауқымды істері және жүйелі жоспарлары сараланды. Сонымен қатар, Асқар Мырзахметов Оңтүстіктегі партия мүшелерінің түрлі ұсыныстарын тыңдап, ереже мен талаптарға өзгертулер енгізілуі мүмкін екенін айтты. «Нұр Отан» партиясының кезектен тыс 24-ші конференциясына бастауыш партия мүшелері, аудан қала әкімдері мен барлық деңгейдегі мәслихат депутаттары арысы ат арылтып аудандардан, берісі қала ішінен келіп жатты.Әрине «Айғақ» телеарнасының түсірілім тобы мұндай сәттерді назардан тыс қалдырмады. Қымбат автокөліктерді тізгіндеген халық қалаулылары, қызметтік көлік мінген басқарма басшылары, аудан-қала әкімдері сондай-ақ, зиялы қауым өкілдері бірінен соң бірі сағат 9-00ден бастап «Нұр Отанның» бас ғимаратына жиналды. Өздеріңізге белгілі, партия отырысы сирек өткізілетіндіктен алыс-жақын аймақтан келген нұротандықтар хал сұрасып, ырзалықпен амандасып жатты. Негізгі мақсат пен міндет біреу. Облыстағы көшбасшы партияның төрағасын сайлау болатын.
Сонан соң барлығы дерлік, тіркеуге тұрып, зал ішіне жайғасты. Партия мүшелері жаңа өзгерісті,жаңа серпілісті күтіп тұрғандай. Яғни облыстық «Нұр Отан» партиясы төрағасы мен саяси кеңес және бюро мүшелері арасындағы ауыс-түйістің орындалатындығы белгілі. Сондықтан Асқар Мырзахметов алғашқы сәтте өңірлік партияның төрағасын таныстырып, алдағы жұмысына сәттілік тіледі. Елбасы Нұрсұлтан Назарбаев жетекшілік ететін «Нұр Отан» партиясы Қазақстанда ғана емес, әлемде өзіндік орны бар, бағыт бағдары айқын, даму жолы дараланған ұйым. Мемлекеттік бағдарламалардың жүзеге асуын бақылап, қадағалауда ұстайтын болашағы жарқын партияның Оңтүстіктегі филиалының төрағасы енді Бейбіт Атамқұлов. Талап тілегін жеткізетін халықтың сенімді тірегі, егемен елдің болашаққа бастар жолының басты бағыты болып отырған партияның Оңтүстіктегі филиалына артылған жүк те, салмақ та ауыр екені белгілі. Халық артқан сенімді арқалаған басшы жетекші ұйымның жұмысы жүйелі болып, толағай табысқа кенеліп, еңбек ететінін сөзге тиек етті. Бір ауыздан қолдау танытқанын әріптестеріне алғыс блідірді. Еліміздегі жетекші ұйым төрағасының бірінші орынбасары болып тағайындалғалы бір айдың жүзі болған тұста, Асқар Исабекұлы өңірге келіп, «Нұр Отан» партиясының 7 айда атқарылған жұмыстарын тыңдады. Сонымен қатар, жиынға қатысушылардың ұсыныстарын да назардан тыс қалдырмады. Нұрсұлтан Назарбаев өз сөзінде «Нұр Отан» партиясы бұл шешімдерді іске асыруға қабілетті, күшті саяси ерік жігердің қуатты көзі, елді дамытудың іріктендіруші» секторы деп атап өткен болатын. Сондықтан болар, көшбасшы партияның беделі артып, елмен етене, әлеуметпен әріптес болып келеді. Ендігі жерде партияның жүйеленген жұмысын ары қарай жандандыру Елбасы сенім артқан Асқар Мырзахметовте. Оңтүстікті даму көкжиегіне жеткізіп, жемісті жұмыс атқарған партия төрағасының бірінші орынбасары қызметіне тағайындалып, іске де кірісіп кетті.
«Нұр Отанның» алдында тұрған ендігі басты міндет – Елбасының бағдарламалары, әсіресе, 5 институционалдық реформа мен «100 нақты қадам» Ұлт жоспарын жүзеге асырылуын қамтамасыз ету болмақ.
Еңлік ЗАМАНХАН
