91 жасқа қараған шағында Социалистік Еңбек Ері Әуезхан Салықбаев өмірден озды. 1929 жылы Арыс қаласында дүниеге келген ел ағасы темір жол саласында ғұмыр бойы еңбек еткен. Тоғыз жолдың торабында орналасқан Арысты «жан жүрегім» дейтін Әуезхан Салықбаевтың туған жерге деген махаббаты ерекше болатын. Арыста жарылыс болған сәтте дүйім жұртты сабырлыққа, ынтымаққа шақырған қазыналы қария. 
1966 жылы Социалистік Еңбек Ері атанған Салықбаевтың еңбек жолына қысқаша тоқталып өтсек. Әуезхан Салықбайұлы — өзінің туған жері Арыс қаласын түлетіп, теміржол саласын дамыту арқылы ел экономикасын көтеруге елеулі үлес қосқан азамат. Еңбек жолын қатардағы теміржолшы болып бастаған. Арыс қаласының, Оңтүстік Қазақстан облысының Құрметті азаматы. Ұзақ жылдар Арыс станциясын, Шымкент теміржол бөлімшесін басқарып, қала мен облыстың әлеуметтік-экономикалық дамуына барынша мол үлес қосты. Ғұмыр бойы теміржол мамандарын даярлауға айрықша назар аударды. Бүгінде оның шәкірттері Қазақстан темір жолының барлық жауапты телімдерінде жемісті еңбек етіп жүр. Түркістан облысында ойып алар орны ерекше азаматтың дүниеден өтуіне байланысты қайғыра көңіл айтамыз. Еңбек Ерінің жаназасы 23-ақпан күні сағат 15-00-де Арыс қаласындағы өз шаңырағында өтеді.
«Айғақ-ақпарат»
