Мегаполисте «Поэзия бұрышы» ашылды

Шымкент қаласында Қазақстан Республикасының Тұңғыш Президенті-Елбасының «Ұлы даланың жеті қыры» атты бағдарламалық мақаласындағы басымдықтар шеңберінде  «Поэзия бұрышы» ашылды, деп хабарлайды «Айғақ-Ақпарат» тілшісі. Алдын ала Шымкент қаласы әкімінің баспасөз қызметінің таратқан ақпаратына сәйкес, «Поэзия бұрышы» Қазақстан Жазушылар одағының төрағасы Ұлықбек Есдәулеттің шығармашылығына арналған делінген болатын. Кейіннен белгілі болғандай, ақын Ұ.Есдәулет салтанатты шараның алғашқы, мәртебелі қонағы болып шықты. Сонымен, бұл жиын өлеңмен өрнек тоқыған қазақ ақындарының құрметіне орай ашылыпты. Тиісінше, «Мәртебелі поэзия мінбері» атты апталыққа орай ұйымдастырылған.

«Поэзия бұрышын» ашуға Шымкент қаласының әкімі Ерлан Айтаханов қатысып, лентасын ел азаматтарымен бірге қиды.  Ерлан Қуанышұлы өз сөзінде ТМД-ның мәдени астанасы атанған Шымкент қаласында биылғы жылы оң өзгерістер болатындығын, жан-жақты барлық салаларға көңіл бөлінетіндігін айтты. Соның негізгі бастамасы ретінде бүгінгі ашылып отырған «Поэзия бұрышы» екендігін жеткізді. Қазақтың бары да, нары да өлең мен рухани құндылықтарымыз, оны сақтап қалу жүрегінде патриоттық сезімі бар әрбір азаматқа парыз екендігін тілге тиек етті. Сонымен қатар, биылғы жылы ұлы ойшыл Әбу Насыр Әл-Фарабидің 1150 жылдығы, қазақтың ұлы ақыны Абай Құнанбаевтың 175 жылдығы аясында да мегаполисте мәдени іс-шаралар мен түрлі жұмыстардың атқарылатындығын айтып өтті.

Қазақ өлеңінің мәртебесін көтеріп, қаламгер қауымына ерекше шабыт сыйлайтын «Поэзия бұрышы» мегаполистегі Жеңіс саябағында орналасқан. Бұл орынның Шымкент халқы үшін маңызы зор. Себебі, мұнда қазақтың ақындық өнері мен рухани құндылықтары насихатталып жатыр. 

Осыған орай, дәл бүгін игі істің жалғасы ретінде  «Мәртебелі поэзия мінбері» атты поэзия апталығының ашылу салтанаты өтеді. Сонымен қатар, онда ақын Ұлықбек Есдәулеттің кітап көрмесі қойылатын болады.