Қор КВИ қарсы күреске қатысқан медицина қызметкерлеріне 32 млрд теңгеден астам үстеме ақы төледі
Әлеуметтік медициналық сақтандыру қоры биыл наурыздан маусым айына дейін инфекциялы қауіпті аумаққа жұмысқа тартылған медицина қызметкерлерінің еңбекақысына қосымша 32 млрд теңгеден астам қаржы төледі. Үстеме ақы үшін республикалық бюджеттен жалпы 38,1 млрд теңге бөлінді.
Соның ішінде, Түркістан облысы бойынша жалақыдан бөлек 5 мыңнан астам медицина қызметкерлеріне 2 867 134 712,30 теңге үстеме ақы төленген. Бұл туралы «ӘМСҚ» КЕАҚ Түркістан облысы бойынша филиалының баспасөз қызметі мәлімдеді.
Республика бойынша ең үлкен соманы — 42% немесе 13,4 млрд теңге, Түркістан облысы бойынша — 49 % немесе 1,4 млрд теңгені — 2-ші тәуекел тобының қызметкерлері алды: провизорлық стационарлардың дәрігерлері, орта және кіші медицина қызметкерлері, жедел медициналық жәрдем дәрігерлері мен фельдшерлері, сонымен қатар санитарлық авиацияның дәрігерлері мен орта медицина қызметкерлері (жұмысқа тартылған жағдайда).
Ал саны бойынша 3-ші тәуекел тобының медицина қызметкерлері басым – үстеме ақы алған барлық медицина қызметкерінің 52% немесе 80,5 мың адам. Түркістан облысы бойынша 3-ші тәуекел тобы барлық медицина қызметкерінің 49 %-н, яғни 3,5 мың адамды құрады.
Инфекциялы қауіпті аумаққа жұмысқа тартылған медицина қызметкерлері санының ай сайын өсуі байқалады. Егер наурыз айында 19 мыңнан астам қызметкер үстеме ақы алған болса, маусым айында олардың саны 53 мың адамға дейін артты. Сонымен қатар, Түркістан облысында КВИ-ге қарсы күрес шараларына наурыз айында 2мыңдай медицина қызметкері қатысқан болса, маусым айында 5,3 мың медицина қызметкеріне жетті.
Бұдан басқа, медициналық сақтандыру жүйесіне қатысушы медициналық ұйымдарды қолдау шаралары қабылданды.
«Қазір аурухана мен емханалар өте қиын жағдайда жұмыс істеуде. Оларды қолдау үшін Қор алғы төлем сомасын 50% дейін арттырды. Ал ауылдық ауруханалар желісіндегі қаржылық тұрақтылықты сақтау үшін жоспарлы медициналық қызметтер көлемі төмендеседе базалық қаржыландыру жүргізілді. Сондай-ақ, пандемия кезеңінде Қор медициналық ұйымдардың шарттық міндеттемелеріне мониторинг жүргізуге мораторий жариялады», — деді «ӘМСҚ» КЕАҚ Түркістан облысы бойынша филиалының директоры Асхат Бейсенбаев.
