10 талапкер ҰБТ-ден шеттетілді

Шымкентте Ұлттық Бірыңғай Тестілеудің алтыншы легінде жалпы 403 талапкер тест тапсырды. Түлектер 11 жыл бойы оқып білгендерін, жадына түйгендерін түйіндеп, білім бәйгесінде бақтарын сынады. Дегенмен,  алтыншы кезең де кемшіліксіз өтпеді. Атап айтар болсақ, тыйым салынған заттарды алып кірмек болған 10 талапкер сынақтан шеттетілді. Олардың қатарында 8 талапкер сынақ бөлмесіне жетпей, ал 2 талапкер аудитория ішінде тыйым салынған заттарды қолданғаны үшін тест тапсыру мүмкіндігінен айырылып отыр.

27 маусым күні басталған тестілеудің 6 – легінде Шымкент қаласының нөмірі №1, №80, №31 және атаулы №41 мектептерінің түлектері сынақ тапсыруда.Тестілеудің алғашқы күнгі нәтижесімен салыстырғанда, бүгінгі таңда заңға қайшы келетін әрекеттер азайған. Бірақ, әлде де заңбұзушылықтар тоқтар емес. Бұл жайында ОҚМПУ ректорының міндетін атқарушы Гүлжан Сүгірбаева мәлімдеді. Айтуынша, заңға қарсы әрекеттер тесттің алғашқы күндегі заңбұзушылықтармен салыстырғанда әлдеқайда төмендеген.
ҰБТ-ге қатысушыларды тәуелсіз сарапшылар қадағалады. Сынақ барысына мониторингтік топ мүшелері, қоғам қайраткерлері, ерікті жастардан құралған Шымкент «Адалдық алаңы» жобалық кеңсесі жетекшілік жасады. Осы ретте, Жұмысшы топ оқушыларды тек өз білімдеріне ғана сүйене отырып, тест тапсыруға шақырады. Мұндай қатаң тексеріс пен ашықтық болашаққа қадам басқалы отырған жас буынға адалдық пен тазалықты дәріптеу жолындағы игі істердің бірі болмақ.