70 жасқа қараған шағында ҚР Ауыл шаруашылығы министрлігі, «ҚазАгроИнновация» акционерлік қоғамы Мақта шаруашылығы ғылыми-зерттеу институтының бас директоры, белгілі агроном-ғалым, ауыл шаруашылығы ғылымдарының докторы, ҚР Ауыл шаруашылығы академиясының академигі Үмбетаев Ибадулла Изатуллаұлы өмірден өтті, — деп хабарлайды «Ұлттық аграрлық ғылыми-білім беру орталығы» баспасөз қызметінен.
Ибадулла Изатуллаұлы Отандық аграрлық білім, ғылым, өндірісінің өркендеп, дамуына елеулі үлес қосты.
Қазақ ауыл шаруашылық институтын (бүгінгі Қазақ ұлттық аграрлық университеті) және Бүкілодақтық ғылыми-зерттеу мақта институтының аспирантурасын бітірген. 1972-1978 жылдары – мақта шаруашылық тәжірибе стансасы зертханасының зерханашысы, ғылыми қызметкері, меңгерушісі. 1978-1979 жылдары – Бүкілодақтық ғылыми-зерттеу мақта институтының аспиранты. 1979-1982 жылдары – Жетісай аудандық ауыл шаруашылығы басқармасының бас агрономы, аудандық партия комитеті бөлімінің меңгерушісі, кеңшар директоры. 1982-1988 жылдары – Келес аудандық атқару комитеті төрағасының бірінші орынбасары, аудандық агроөнеркәсіптік бірлестіктің төрағасы. 1988-1991 жылдары – Шымкент облыстық агроөнеркәсібі төрағасының орынбасары, бірінші орынбасары, Бөген аудандық атқару комитетінің төрағасы. 1991-1992 жылдары – Шымкент облыстық атқару комитеті төрағасының орынбасары. 1992-1997 жылдары – Жетісай аудандық әкімшілігінің басшысы, әкімі, Мақтаарал су шаруашылық жүйесі басқармасының бастығы. 1997-1999 жылдары – Мақтаарал ауданының әкімі. 1999-2006 жылдары – Мақтаарал ауыл шаруашылық тәжірибе стансасының директоры. 2006-2007 жылдары – «Мақта шаруашылығы ғылыми-зерттеу институты» еншілес мемлекеттік кәсіпорнының директоры қызметтерін атқарған.
Өмірінің соңына дейін Мақта шаруашылығы ғылыми-зерттеу институтының бас директоры қызметін абыроймен атқарып, бірқатар халықаралық, мемлекеттік марапаттар алған.
Қазақстан Журналистер одағы сыйлығының, А.Бараев атындағы мемлекеттік сыйлығының иегері, «Оңтүстік Қазақстан облысының жыл адамы», Жетісай және Мақтарал аудандарының құрметті азаматы құрметті атағына ие болған.
«Ұлттық аграрлық ғылыми-білім беру орталығы» КеАҚ ұжымы марқұмның отбасына, жақын туыстары мен әріптестеріне қайығыларына ортақтасып көңіл айтады.
Қайраткер ғалым, іскер басшы, білікті маман Үмбетаев Ибадулла Изатуллаұлының елеулі еңбегі өзінен кейінгі жас буынға үлгі өнеге.
Иманы саламат, топырағы торқа болсын.
МЕМЛЕКЕТ БАСШЫСЫ XI «АЙБЫН» ХАЛЫҚАРАЛЫҚ ӘСКЕРИ-ПАТРИОТТЫҚ ЖАСТАР ЖИЫНЫНА ҚАТЫСТЫ
Президент – Қазақстан Қарулы Күштерінің Жоғарғы Бас қолбасшысы Қасым-Жомарт Тоқаев XI халықаралық «Айбын» әскери-патриоттық жастар жиынының ашылу рәсіміне қатысты....
