Түйе сүтін өңдеуші зауыт алғашқы өнімін экспортқа шығарды

Өткен жылы Түркістан қаласында іске қосылған «Golden Camel» зауыты алғашқы өнім жинағын Қытай еліне экспортқа жөнелтті. Яғни алпауыт кәсіпорыннан шыққан алғашқы 13 тонна құрғақ түйе сүті тиелген жүк көлігі жолға шықты. Бұл зауыт түйе сүтін өңдеп, содан құрғақ сүт алумен айналысады. Өндіріс тәулігіне 100 тонна түйе сүтін қабылдап, одан құрғақ шұбат өндіруге қауқарлы.

Зауыттың бас директоры Янг Джидің айтуынша, мұнда шығарылған тауардың 98 пайызы Қытай Халық Республикасына сонымен бірге өзге де алыс жақын шет елдерге экспортталады. Сондықтан өнім сапасына қойылар талап – қатаң, сапа стандарттары – жоғары. Сәйкесінше өндіріс процессі де бірнеше кезеңнен тұрады.

Зауыт толық қуаттылығына жұмыс істеуі үшін тәулігіне 100 тонна сүт, яғни шикізат қажет екен. Дәл қазіргі таңда Түркістан облысындағы бірнеше түйе шаруашылықтарымен сөйлесіп, түйе сүтін жинауға келісім жасалған. Алдағы уақытта көлемі ұлғаяды.Ал ең бастысы түйе сүтінен құрғақ өнім дайындайтын алпауыт зауыт облыс үшін өте тиімді. Өйткені өңірде түйе шаруашылығы дамитын болады. Сондай-ақ, жергілікті жұрт жұмыспен қамтылады. Мәселен, бүгінгі таңда осы кәсіпорында 127 азамат еңбек етуде. Бастысы, отандық шипалы өнімді шетелге экспорттауға мүмкіндік туып отыр. Ал құрғақ күйдегі түйе сүтінің өзі көптеген дертке дауа, емге шипа болып табылады.

Айғақ-ақпарат