Президенттік жастар кадр резервінің өкілі Түркістанда басшылық лауазымға тағайындалды

Мемлекет басшысы Қасым-Жомарт Тоқаев дарынды жастар үшін ашық және тиімді әлеуметтік саты құру туралы идеяны алға тартқан болатын.

Осы жоба барынша даярланған және тәжірибелі жастар үшін мемлекеттік басқару және квазимемлекеттік сектор жүйесінде басшылық қызметке тұруға бірегей мүмкіндік ашады деп көзделді. Жоғары әкімшілік және саяси лауазымдарға бос орындар пайда болған жағдайда Президенттік жастар кадр резервінде тұрған тұлғалардың кандидатуралары қаралуда.

Бұл ретте Президенттік жастар кадр резервіне қабылданған тұлғалар резервте тұрған кезеңде лауазымға міндетті түрде тағайындалуы шарт болып табылмайды. Резервте тұрған тұлғалар ҚР Президентінің жанындағы Мемлекеттік басқару академиясында және оның филиалдарында одан әрі кәсіби және тұлғалық даму үшін оқыту курстары мен тренингтерден өту мүмкіндігіне ие болады.

Осы тұста, Президенттік жастар кадр резервіне қабылданған жастың бірі Самат Рамазанов Түркістан облысының әкімі Өмірзақ Шөкеевтің өкімімен облыстық жер қатынастары басқармасының басшысы болып тағайындалды, — деп хабарлайды «Айғақ-Ақпарат» тілшісі.

Түркістан облысы әкімінің баспасөз қызметі таратқан ақпарат бойынша, Рамазанов Самат Маратұлы 1985 жылы туылған. Заңгер (құқықтану бакалавры, «Болашақ» университеті), Халықаралық менеджмент (Іскерлік әкімшілік магистрі, МВА, Geneva Business School) мамандығы бар.
2002-2016 жылдары түрлі мемлекеттік қызметте болды. 2016 жылдың маусым айынан бастап 2018 жылдың қазан айына дейін квазимемлекеттік секторда әр түрлі лауазымдарда жұмыс істеді. 2019 жылғы наурыздан бастап «TURKISTAN» арнайы экономикалық аймағының Басқарушы компаниясы» акционерлік қоғамында еңбек етті (соңғы атқарған лауазымы – әкімшілік-құқықтық департаментінің директоры). Қазақ, орыс және ағылшын тілдерін еркін меңгерген. Үйленген, бір ұл тәрбиелеп отыр.